Qazaqstanda óskeleń urpaqty ekologııalyq tárbıeleýge baǵyttalǵan respýblıkalyq joba júzege asyrylýda. Azamattyq bastamalardy qoldaý ortalyǵynyń habarlaýynsha, ekobelsendiler eriktilermen birlesip, túrli ekoaksııalar, konkýrstar men senbilikterdi uıymdastyrýda.
«Qazirgi ýaqytta granttyq qarjylandyrý aıasynda biz ekologııalyq baǵytta 2 úlken jobany iske asyryp jatyrmyz. Bıyl bul baǵyttaǵy jobalardyń sheńberinde ÚEU-dan 19 ótinim kelip tústi. Bul basqa taqyryptarǵa túsken ótinimder sanyna qaraǵanda úsh ese artyq. Mundaı úrdis, sondaı-aq bizdiń qoǵamda ekologııalyq bilimniń joǵary suranysqa ıe ekenin kórsetedi. Ekobaǵyttaǵy jobalar barlyq qazaqstandyqtyń bolashaǵyna áser etpeı qoımaıdy», deıdi Azamattyq bastamalardy qoldaý ortalyǵy basqarma tóraǵasynyń orynbasary Jasulan Bısembıev.
Jobany iske asyrý sheńberinde Qazaqstannyń Ekologııalyq qory jastar arasynda beınerolıkter baıqaýynyń bastalǵanyn habarlady. Baıqaýdyń maqsaty – tabıǵatqa degen qamqorlyqty qalyptastyrý. Uıymdastyrýshylardyń aıtýynsha, baıqaýǵa «Men sýdy qalaı únemdeımin?», «Qoqysqa ekinshi ómir syılaıyq», «Meniń aýlam – eń taza aýla» taqyryptaryna beınerolıkter túsirgen mektep oqýshylary nemese stýdentter qatysa alady.
Sondaı-aq qoǵam belsendileri ekologııalyq aksııalar men senbilikterdi, aýmaqtardy tazalaýǵa, abattandyrýǵa baǵyttalǵan basqa da is-sharalardy ótkizbek. Kóktemde elordada elimizdiń mańyzdy oqıǵalaryna oraılastyrylǵan ataýly aǵashtar otyrǵyzýǵa baǵyttalǵan «Jasyl chellendj» uıymdastyryldy. Aksııany Nur-Sultan, Mańǵystaý, Túrkistan, Pavlodar oblystarynyń mektepteri qoldady.
«Búgingi tańda qoǵamda ekologııalyq tárbıe men mádenıetti erte jastan damytý kerek degen ustanym bar. Eger biz balalarǵa ekomádenıetti jastaıynan sińiretin bolsaq, bolashaqta olardyń ekologııalyq saýaty joǵary bolady. Munymen qosa jastardyń ekologııalyq bilim deńgeıin arttyrý baǵytynda keshendi is-sharalar júrgizilýge tıis», deıdi joba jetekshisi Aıgúl Abdýalıeva.
Uıymdastyrýshynyń aıtýyna qaraǵanda, barlyq ekologııalyq aksııaǵa eriktiler tartylady. Olardyń arasynda oqýshylar da, qazaqstandyq kolledjder men joǵary oqý oryndarynyń stýdentteri de bar.
Aıta keteıik, «Jastar arasynda ekologııalyq mádenıetti nyǵaıtý jónindegi sharalar keshenin ázirleý jáne iske asyrý» jobasy Aqparat jáne qoǵamdyq damý mınıstrliginiń qoldaýymen júzege asyrylyp jatyr.