Qazaqtyń tamasha kompozıtorynyń biri Áset Beıseýov ótken ǵasyrdyń sekseninshi jyldarynyń bas kezinde Jambyl oblysynyń meımandos Moıynqum jerinde bir-eki ret qadirli qonaq bolyp qaıtqan edi.
Aýdandyq «Kommýnızm tańy» (qazirgi «Moıynqum tańy») gazetiniń fototilshisi, marqum Qalı Táttibekov túsirgen myna sýrette Ásettiń ádemi bir jańa ánin Moıynqumnyń jeztańdaı ánshisi atanǵan, marqum Zınakúl Qaımaqovanyń úırený sáti beınelengen. Ol buryn da kompozıtordyń «Altynym», «Armandastar, qurdastar» jáne taǵy basqa týyndylaryn naqyshyna keltire oryndaıtyn-dy.
Sol jaqta mıkrofondy ustap turǵan aýdandyq mýzyka mektebiniń dırektory qyzmetin atqarǵan, jergilikti halyq aspaptary orkestriniń dırıjeri bolǵan, aýdandyq mádenıet bólimin basqarǵan ońtústikqazaqstandyq baýyrymyz Tórebek Májibaev (keıinnen, ıaǵnı toqsanynshy jyldardyń aıaq jaǵynda týǵan óńirine qonys aýdarǵan), al Ásekeńniń janynda notaǵa kóz salyp qatar turǵan san túrli aspapta keremet oınaıtyn sheber mýzykant, marqum Tórehan Nurmanbaev.
Zınakúl 1978-1979 jyldarda «Moıynqum» án-bı ansambliniń quramynda Máskeýde, Portýgalııada óner kórsetip, laýreat atanǵan bolatyn. Sol sııaqty Tórebek pen Tórehan da atalǵan jerlerdegi kórermender erekshe rıza bolǵan konsertterge belsene qatysqan edi.
Berikbaı QADYQOV,
jýrnalıst
Almaty oblysy,
Qarasaı aýdany