Syrly aspaptardyń sıqyrly úni

Atalǵan kórmege qazaq hal­qynyń mýzykalyq aspap­tarynyń – ishekti, úrmeli, tilsheli, soqpaly túrlerine jatatyn: jetigen, sherter, qobyz, shańqobyz, asataıaq, tuıaq, qońyraý túrlerimen qatar, dombyra jasaýshy qolóner she­berleriniń buıym­dary bar bar­lyǵy 175 jádiger kórermen nazaryna usynyldy.

Osylardyń ishinde, áı­gi­li ánshi – sazger Jaıaý Mu­sa Baıjanulynyń 1955 jy­ly mýzeı qoryna uly Sa­lyq tap­syrǵan dombyrasy men ishek­teri, jylqy qy­ly­nan jasalǵan qobyzy, qa­zaq­tyń uly aqyny Abaı Qunanbaı­ulynyń jary – Dildá Alshynbaıqyzynyń 1978 jyly mýzeı qoryna shóberesi A.Ysqaqov tapsyrǵan qos ishekti súıektelgen qalaq dombyrasy, qazaq opera óneriniń negizin salýshylardyń biri, áıgili ánshi Kúlásh Baıseıitovanyń anasy tapsyrǵan dombyra, t.b. qoıyldy.

Sonymen qatar qazaq ta­rı­hyndaǵy shoqtyǵy bıik tul­ǵalar – Ámire Qashaýbaev, Ma­­narbek Erjanov, Elýbaı О́mir­zaqov, Qanysh Sátbaev, Qa­sym Amanjolov, Juban Mol­daǵalıev, Kemel Aqyshev, О́z­bekáli Jánibekov syndy ǵylym, mádenıet jáne óner maıtalmandarynyń mýzy­ka­lyq aspaptary da kórermen kózaıymyna aınaldy.

Osy oraıda, mádenı shara­ny ashyp sóz sóılegen Má­de­­nıet jáne sport vıse-mı­nıstri Nurǵısa Daýeshov: «Barshańyzdy kele jatqan Ult­tyq dombyra kúni mere­ke­simen shyn júrekten quttyq­taımyn. Búgin Ulttyq mýzeıde tuńǵysh ret mádenı as­­ta­namyz – Almaty qala­syn­­daǵy Memlekettik orta­lyq mýzeıiniń «Syrly aspap­tardyń sıqyrly úni» atty kórmesi ashylýda. Bul kórme – qala turǵyndary men qonaqtaryna erekshe áser beredi dep oılaımyn. Eks­pozısııadan oryn alǵan árbir tarıhı murany tamashalaýshy­lar qazaqtyń ulttyq aspaptary arqyly ulttyq ónerimizdi tanyp, tarıhymyzdy bilýge erekshe áser etedi degen oıdamyn. Qazaq mýzykasyn zert­teýshi kórnekti ǵalym, áıgi­li kompozıtor Ahmet Ju­ba­nov atamyz aıtqandaı, qazaq­tyń dombyrasynyń árbir per­nesinde bizdiń ótken tarıhymyz, qýanyshymyz ben muńymyz jatyr. Mádenıet jáne sport mınıstrligi osyndaı ıgi is-sharalardy tek dombyra kúninde ǵana emes, jyl boıy ótkizetin josparly baǵ­darlama qurýda. Búgingi kórme­niń de sımvolıkalyq máni erek­she. Ulylarymyz ustaǵan dombyralar sol kezdegi tarıhymyzdy elestetedi. Qazaq bar jerde dombyra máńgilik. Ultymyzdyń osyndaı kıeli, qasıetti óneri árqashan bıikte bolsyn!», dedi

Is-shara barysynda mýzyka­lyq aspap jasaýdyń sheberi Sabyr Arǵyn arnaıy sheberlik dárisin ótkizse, «Qaraqat» mektep stýdııasy oqýshylary dombyra jáne jetigen ulttyq aspaptarymen qazaqtyń án-kúılerin oryndady.