ASTANA. 28 sáýir. Búgin Elbasy Nursultan Nazarbaev M.Lomonosov atyndaǵy Máskeý memlekettik ýnıversıtetinde sóılegen sózinde Keńes Odaǵynyń qaıta qurylýy múmkin emestigin atap ótti. Bul týraly «24 KZ» telearnasy habarlady.
«Qazirgi kezde Eýrazııalyq ekonomıkalyq odaq týraly áńgime bola qalǵan jaǵdaıda keıbir sarapshylar men saıasatkerler máseleniń mánisine barmaı jatyp, bolashaqta Keńes Odaǵynyń qaıta qurylýy múmkin ekenin aıtyp, qoǵamdyq pikir qalyptastyrýda. Menińshe, bul qate pikir jáne qazirgi bizdiń quryp jatqan ekonomıkalyq odaqtyń maqsatyna múldem kelmeıdi», - dedi Prezıdent.
Osyǵan dálel retinde Prezıdent mynadaı mysaldar keltirdi. «Birinshiden, búgingi tańda keńestik qoǵamdyq júıeni qurý úshin ınstıtýsıonaldyq baza joq. Ekinshiden, postkeńesik keńistiktegi halyqtar ózderiniń dástúrleri men erekshelikterine saı memleketterin quryp alǵan. Úshinshiden, qazirgi jekemenshik júıesi, áleýmettik qurylymdar men qoǵamnyń ekonomıkalyq salalary keńestik arhaıkadan áldeqashan uzap ketken», - dedi ol. Sonymen birge Elbasy álemdik saıasatkerlerdiń óńirlik ıntegrasııalyq jobalardyń ishinde Eýrazııalyq ekonomıkalyq odaqtyń qurylýyna syn kózben qaraıtyndaryn da jasyrmady.
Kezdesýde Prezıdent buǵan túsinistikpen qaraıtynyn, óıtkeni, Eýrazııalyq ekonomıkalyq odaq bolashaqta basqa da álemdik ıntegrasııalyq birlestikterge básekeles bolatynyn, sol úshin keıbir elder EEO-tyń qurylýynan seskenetinin atap ótti.
Dastan Kenjalın.
Derekkóz: «24 KZ».
Foto: www.e1.ru.