El damýynda ekonomıkamen qatar óner men mádenıettiń de alar orny erekshe. Osydan da kezinde «El ishi – óner kenishi» atty baıqaý uıymdastyrylyp, oǵan iri ortalyqtardan shalǵaı jatqan aýyl turǵyndary qatysatyn. Osy áýesqoılardyń arasynda kásibı mamandardan kem túspeı jatatyn ónerpazdar da kezdesip qalatyn edi. Áıteýir, osy baıqaýdyń aýyldyqtardy taǵy bir qyrynan tanytyp, eldi rýhanı tárbıeleýge qosatyn úlesi úlken bolatyn.
Jýyrda Qyzylorda qalalyq mádenıet jáne tilderdi damytý bólimi el jadynan óshe bastaǵan osy jaqsy dástúrdi jandandyryp, qala mańyndaǵy aýyl ónerpazdary qalalyqtar aldynda óner kórsetti.
– Qalalyq mádenı-demalys parkinde 13-30 maýsym aralyǵynda ótken baıqaýdyń qatysýshylary oblys ortalyǵyna jaqyn ornalasqan eldi mekender turǵyndary boldy. Eldiń rýhanı dúnıetanymyn jańǵyrtyp, ulttyq qundylyqtardy dáripteýdi maqsat tutqan baıqaýdy qala ákimdigi qoldap, aýyl ónerpazdary erejege saı konserttik baǵdarlama ázirlep, kitap jáne qolóner kórmesin jasady, – deıdi qalalyq mádenıet jáne tilderdi damytý bóliminiń basshysy Jaǵypar Tájmahanov.
Baıqaýǵa qazylyq jasaǵandar Qyzyljarma aýyldyq mádenıet úıiniń ónerpazdary kóptigin jáne konserttik baǵadarlama boıynsha ár túrli janrda óner kórsetkenin, Tasbóget kentindegi S.Maıqanova atyndaǵy mádenıet úıi ónerpazdary júldeger atanǵan ónerpazdardan sherý jasap erekshelengenin aıtyp otyr. Al Qaraózek aýyldyq mádenıet úıiniń konserttik baǵdarlamasy kórkemdik jaǵynan utymdy uıymdastyrylyp, osy aýyldaǵy mádenıet úıiniń meńgerýshisi Aıdos Baıkenovtyń óner saıysynda alǵash ret oryndalǵan «El ishi – óner kenishi» atty áni baıqaýdyń basty tabysy boldy.
Eki aptadan astam ýaqyt qalalyq parkke jınalǵandarǵa óner keshin syılaǵan baıqaýdyń bas júldesin Qyzyljarma aýyldyq mádenıet úıi alsa, birinshi oryn Tasbóget kentindegi S.Maıqanova atyndaǵy mádenıet úıi ujymyna buıyrdy. Ekinshi oryndy Qaraózek aýyldyq klýby ónerpazdary, úshinshi oryn júldesin Belkól kentiniń klýby men Aqsýat aýyldyq mádenıet úıi ıelendi. Abaı aýylyndaǵy mádenıet úıine, Talsýat jáne Qaraýyltóbe aýyldyq klýbtaryna yntalandyrý syılyǵy tabys etildi. Qaıta jańǵyrǵan baıqaý qorytyndysynda jekelegen qatysýshylar da túrli atalymdar boıynsha marapattaldy.
Qyzylorda