Kaspıı teńiziniń ústinde qos qanatyn sabalap, sharq uratyn shaǵala tosyn indetke ushyraǵan sekildi. Atyraý oblystyq orman sharýashylyǵy jáne janýarlar dúnıesi ınspeksııasynyń bólim basshysy Mereke Shalqarovtyń aıtýynsha, «Qashaǵan» ken ornyn ıgerip jatqan «Nort Kaspıan Opereıtıng Kompanı N.V.» kompanııasynyń ókilderi 19 maýsymda shaǵalanyń jappaı qyrylǵany jóninde jedel habar bergen. Ken ornyndaǵy DS-04 jáne DS-01 jasandy aralynda 2 750 qara shubar tuqymdy shaǵala qyrylǵan.
– Osyǵan baılanysty ınspeksııa tarapynan arnaıy komıssııa qurylyp, shaǵala qyrylǵan aýmaqta profılaktıkalyq tekserý júrgizdi. Qustardyń ólý sebebin anyqtaý maqsatynda sý, topyraq jáne aýa synamalary, qustardyń ólekseleri zertteýge alyndy. Atyraý oblysynyń aýmaǵynda osyǵan uqsas jaǵdaılardy anyqtaý maqsatynda tolyq baqylaý monıtorıngi qolǵa alyndy. Al 26 maýsymda Kaspıı teńiziniń soltústik bóligindegi Shalyga aralynyń aýmaǵynda shaǵala tuqymdas 2 500 qustyń ólgeni anyqtaldy. Onyń ishinde 1 myń «Chegrava», 1 200 «Qara bas ógizshaǵala», 300 «О́gizshaǵala» bar. О́lgen qustardyń bıomaterıaldary alynyp, Almaty qalasynyń Mıkrobıologııa jáne vırýsologııa ınstıtýtyna jiberildi, – deıdi M.Shalqarov.
Onyń málimetine qaraǵanda, ólgen qustardyń synamalarynan «AN5» qus tumaýyna oń nátıje anyqtalǵan. Bul derek Aýyl sharýashylyǵy mınıstrligi veterınarlyq baqylaý jáne qadaǵalaý komıtetiniń veterınarııa boıynsha ulttyq referenttik ortalyǵynyń mamandary joldaǵan jaýapta rastalǵan. О́lgen qustardyń synamalary dıagnozdy qaıta rastaý úshin HEB (Ulybrıtanııa) referenttik zerthanasyna jiberilip otyr.
– Qazir oblystaǵy jaǵdaı tolyqtaı baqylaýǵa alyndy. Atalǵan jaıt anyqtalǵaly ólgen qustardyń jalpy sany 5 750-ti qurap otyr, – dep málim etti M.Shalqarov.
Oblystyq aýmaqtyq ınspeksııasy basshysynyń mindetin atqarýshy Myrzabek Dúısenovtiń aıtýynsha, Atyraý qalasyndaǵy 7 aýyldyq okrýg turǵyndarynyń úı qustaryn egý qolǵa alyndy. Dúısenbige deıin tórt okrýgti meken etken turǵyndar ıeligindegi 2 382 qusy túgeldeı egilgen. Al úsh okrýgtegi úı qustaryn osy aptanyń sońyna deıin egý kózdelip otyr.
– Atyraý qalasynyń aýmaǵynda ornalasqan 7 okrýgte 1 200 qaz ben 5 091 taýyqqa qus tumaýy aýrýyna qarsy vaksına egý bastaldy. Bul úshin veterınarlyq preparattardyń respýblıkalyq qorynan 6 291 doza vaksına bólindi. Qazir «Epızootııaǵa qarsy respýblıkalyq otrıady» RMM-nyń Atyraý fılıaly men kórshiles Batys Qazaqstan oblysynan 12 adamnan jasaqtalǵan 4 brıgada 2 382 qusqa ekpe saldy, – deıdi M.Dúısenov.
Atyraý oblysy