Tennısten Qazaqstan quramasynyń sportshylary bıyl jarap tur. Jyldyń alǵashqy jartysynda úsh birdeı (erler, áıelder jáne jasóspirimder) quramamyz tarıhta alǵash ret bir mezette álem chempıonatynyń fınalyna shyǵyp, qazaqstandyqtarǵa úlken qýanysh syılaǵan edi. Endi, mine, áıelder arasynda Qazaqstannyń birinshi, álemniń 23-raketkasy Elena Rybakına taǵy bir tarıhı nátıjege qol jetkizip, qazaqstandyq jankúıerlerdi serpiltip tastady.
Londonda ótip jatqan «Úlken dýlyǵa» sanatyndaǵy «Ýımbldon» týrnırinde Elena Rybakına áýeli jarystyń jartylaı fınalyna joldama alyp, qazaqstandyq tennısshiler arasynda osyndaı tarıhı mejeni baǵyndyrǵan tuńǵysh sportshy atanǵan edi. Jarystyń 17-raketkasy bolyp tirkelgen qazaqstandyq tennısshi shırek fınalda dúnıejúzilik reıtıngte 44-orynda turǵan aýstralııalyq Aıla Tomlıanovıchten úsh sette basym tústi.
Eki saǵatqa sozylǵan básekeniń birinshi partııasynda aýstralııalyq tennısshi á degennen esepte alǵa shyǵyp, sol qarqynyn partııa sońyna deıin saqtaı aldy – 6:4.
Tez es jıyp úlgergen Elena Rybakına ekinshi sette qarsylasynan ese qaıtardy – 6:2. Al úshinshi, sheshýshi partııada da qazaqstandyq sportshy óz myqtylyǵyn dáleldep, qarsylasyna esh múmkindik qaldyrmady – 6:3. Match barysynda E.Rybakına 15 eıs jasap, 9 breık-poınttyń beseýin utymdy paıdalandy.
Sóıtip, jerlesimiz fınalǵa shyǵý úshin álemniń 18-raketkasy, «Úlken dýlyǵa» jarysynyń eki márte jeńimpazy rýmynııalyq Sımone Haleppen kezdesti. Eki tennısshi de bir-biriniń qyr-syryn óte jaqsy biledi. Sebebi buǵan deıin tennısshiler kortta úsh márte kezdesip, ekeýinde Halep, bireýinde Rybakına jeńiske jetken. Bul match otandasymyz úshin karerasyndaǵy eń mańyzdy oıynnyń biri boldy.
Oıyn jerlesimizdiń birden breık jasaýymen bastaldy da, ol birinshi partııa aıaqtalǵansha osy basymdyǵyn qarsylasyna bergen joq – 6:3. Ekinshi set te E.Rybakınanyń birden breık jasaýymen bastalǵanymen, bul joly S.Halep tarazy basyn teńestire aldy. Alaıda qarsylasynyń bul qadamy otandasymyzdyń saǵyn syndyra alǵan joq. Ile-shala ese qaıtarǵan Elena taǵy da eki geım alǵa shyqty da osy basymdyǵyn set aıaqtalǵansha ustap turdy. Qorytyndy esep – 6:3, 6:3.
Osylaısha, Elena Rybakına óziniń sporttyq mansabyndaǵy alǵashqy úlken jetistigine qol jetkizdi. Jalpy, bul onyń jeke ǵana tabysy emes, tutas Qazaqstan tennısiniń osyndaı deńgeıdegi alǵashqy jetistigi bolyp otyrǵanyn erekshe atap kórsetken jón.