Astanadan Býrabaı kýrorty jáne Qaraǵandy qala mańy aralyǵyndaǵy temir jol qatynasy jańa sapalyq dúnıege kóterildi. «Qazaqstan temir joly» kompanııasynyń tapsyrysy negizinde Reseı Federasııasynyń Demıhov mashına jasaý zaýyty shyǵarǵan ED9E serııasyndaǵy «Oqjetpes» jáne «Saryarqa» atalatyn qazirgi zamanǵy eki elektrpoıyzy ótken jumada ózderiniń alǵashqy jolaýshylaryn qabyldap alyp, olardy jaıly jaǵdaıda qajetti jerlerine jetkizdi.
Bul QTJ men reseılik temir jol jyljymaly quramyn shyǵarýshy arasyndaǵy birinshi joba emes. 2003 jyly Qazaqstan Prezıdenti Nursultan Nazarbaev dál osyndaı alǵashqy elektr poıyzynyń elordadan elimizdiń kýrortty óńirine bastalǵan alǵashqy saparyna sáttilik tilep, shyǵaryp salǵan bolatyn. Sodan bergi ýaqytta reseılik jyljymaly quram shyǵarýshymen aradaǵy bul jumys toqtap kórgen joq. Bul zaýyttan «Qalamańy tasymaly» AQ úshin elektrpoıyzdaryna arnalǵan 32 vagon satyp aldy. Onyń 20 vagonyn 2010 jyly, 2 vagonyn 2011 jyly, 10 vagonyn 2013 jyly satyp alyp, qatarǵa qoıdy.
– Biz jolaýshylardy osynaý óte jaıly qazirgi zamanǵy vagondarmen saparǵa shyǵýǵa shaqyramyz. Bul vagondarda jolaýshylar qolaıyna jaǵatyn birqatar jaǵymdy dúnıeler qarastyrylǵan. Vagondar kondısıonerlermen, jaıly kreslolarmen qamtylǵan. Vagonaralyq ótpeli joldardan burynǵydaı jel keýlep turǵan joq. Onyń ústine poıyzdyń qaı jerde kele jatqany júgirtpe joldar arqyly jolaýshylarǵa turaqty túrde habarlanyp otyrady. Vagonda Wi-Fi júıesi jumys isteıdi, – deıdi «Qalamańy tasymaly» AQ prezıdenti Baıan Sýnnatova.
Jyljymaly quramdy shyǵarýshy onyń ústine onyń elektr qýatyn meılinshe az tutynýyn da qarastyrǵan. Munyń ózi «jasyl ekonomıka» turǵysynan alǵanda tótenshe mańyzdy másele bolyp tabylady.
– Qýat únemdeý tehnologııalary arnaýly ázirlengen elektr qural-jabdyqtaryn qoldaný esebinen elektr qýatyn edáýir dárejede, atap aıtqanda, 20 paıyzǵa deıin únemdeıdi, – deıdi «Demıhov mashına jasaý zaýyty» AAQ kommersııalyq dırektory Aleksandr Loshmanov.
Ústimizdegi jyldyń ekinshi toqsanynda QTJ úshin ED9E elektrpoıyzynyń 40 vagonyn jetkizý kútilýde. Bul árqaısysy 8 vagonnan turatyn 5 jyljymaly quram «Astana – Býrabaı kýrorty» jáne «Astana – Qaraǵandy» baǵyttaryna qoıylmaq. Munyń ózi osy aralyqtardaǵy poıyzdyń qozǵalysynyń jıiligin kúnine sáıkesinshe 2 jáne 3 retke deıin jetkizetin bolady.
Osy rette temirjolshylar Memleket basshysynyń Astana men Almatyny aglomerasııalar ortalyqtaryna aınaldyrý jónindegi bergen tapsyrmasyn júzege asyrýǵa ózderiniń de osylaısha úles qosyp otyrǵandyqtaryn maqtanysh qylatyndaı. Árıne, jańadan paıda bolatyn aglomerasııalyq ortalyqtar ózderiniń ekonomıkalyq qýaty arqyly mańyndaǵy óńirlerge de tıimdi yqpal etetindigi túsinikti. Máselen, halyq qozǵalysynyń kúsheıýimen qatar, osy máselede utqyrlyqtyń da paıda bolýy, poıyzdarǵa qyzmet kórsetetin jańa jumys oryndarynyń ashylýy Býrabaı men Qaraǵandy óńirleriniń ekonomıkaǵa tartylysyn odan ári kúsheıte túsetindigi anyq.
Aıtpaqshy, jańa poıyzdar bıletteriniń baǵasy qyzmet sapasynyń áldeqaıda jaqsara túskendigine qaramastan, osy baǵyttaǵy qalǵan marshrýttar deńgeıinde qalyp otyr. Máselen, birinshi synypty vagon baǵasy – 1 088 teńge, ekinshi synypty vagondiki – 1 013 teńge, úshinshi synypty vagondiki – 842 teńge.
Suńǵat Álipbaı,
«Egemen Qazaqstan».