Taıaýda áleýmettik jelilerde halyqtyń qantqa talasyp jatqan vıdeosy taraǵan edi. Bul – Semeıdegi saýda ortalyqtarynyń birinde oryn alǵan jaǵdaı. Qazir jergilikti dúkenderden atalǵan azyq-túlik ónimin arzan baǵaǵa tabý qıyn.
Shildeniń shilińgir kúnderi baqshasy bar azamattardyń jemis-jıdek ósirip, tosap qaınatatyn ýaqyty sanalady. Bul mezgilde qanttyń quny ádettegiden eki esege qymbattaıtynyna halyqtyń eti úırengen. Álbette, buǵan eriksiz kónetin áleýmet bar aqshasyn jumsap, mańyzdy taýardy áýpirimdep júrip satyp alatyn. Alaıda bıylǵy jazda ádettegi qymbatshylyq jaıyna qalyp, atalǵan ónimniń baǵasy eki-úsh esege aspandap ketti. Sodan bolsa kerek, kópshiliktiń ýaqyty shekerdi arzanǵa satatyn jerlerdi ańdýmen ótedi.
Aıtalyq, jýyrda Semeıdegi sýpermarketterdiń birinde qantqa kezekke turǵandardyń qatary kóbeıip, uzyn-sonar keptelistiń aıaǵy talasqa ulasqan. Muny áleýmettik messendjerlerde taraǵan vıdeodan da baıqaýǵa bolady. Keleńsiz jaǵdaıdyń oryn alýyna qanttyń kılosynyń 495 teńgeden satylýy sebep. Al jergilikti dúkenderde onyń baǵasy myń teńgeden bastap 1300 teńgege deıin baryp jatyr.
Vıdeoda baıqalǵandaı, bir adamǵa tek úsh kılo qanttan ǵana berilipti. Sol sebepti atalǵan saýda ornyna turǵyndar tutastaı otbasy múshelerimen barǵan.
Qalalyq ákimdik bolǵan jaıttan habardar. Ákimdiktiń aqparatyna sensek, qantty jetkizýdegi irkilister óndirýshi zaýyttardaǵy logıstıkalyq problemalarmen baılanysty.
«Zaýyttardyń basshylarymen qantty qalanyń kóterme saýda ókilderine dereý jetkizip berý boıynsha jumys júrgizildi. Qantqa qatysty jaǵdaıdy turaqtandyrý úshin kelesideı sharalar qabyldanady. 5 shildede «Ermakova» JK kóterme fırmasyna (qant ortalyǵy) qant tıelgen vagon kelip, qajetti ónim qaladaǵy saýda kásiporyndaryna jetkiziledi. 20 shildege deıin taǵy 3 vagon keledi dep kútilip otyr. Semeı qalasyn qantpen qamtamasyz etý úshin óńirlik turaqtandyrý qorynan qosymsha qant jetkizý týraly suranys jasaldy», delingen ákimdik taratqan aqparatta.
Jýyrda Úkimettiń sıfrly keńsesinde ótken jıynda Saýda jáne ıntegrasııa mınıstrligi Saýda komıtetiniń tóraǵasy Erjan Qazaqbaev respýblıka kóleminde qanttyń jalpy qory maýsymdaǵy ishki tutyný kórsetkishin (59 myń tonna) esepke alǵanda, 101,4 myń tonnany quraıtynyn aıtqan bolatyn. Demek mınıstrliktiń málimetine sáıkes naryq 171,4%-ǵa qamtylǵan.
Premer-Mınıstr Álıhan Smaıylov «úıdiń janyndaǵy» dúkenderdegi baqylaý jumystaryn kúsheıtý qajettigin aıtyp, elimizdi qantpen qamtamasyz etý jóninde tapsyrma bergen edi.
«Aýyl sharýashylyǵy mınıstrliginiń derekteri boıynsha, qant qory 100 myń tonnadan asady. Al bir aılyq tutyný kólemi – 59 myń tonna. Bul jetkilikti kólem. Dese de «úıdiń janynda» ornalasqan jekelegen dúkenderde qant 700-800 teńgeden satylady. Bul qoldan jasalǵan suranysty paıdalanyp, ekstra-marjany tabýdy kózdegen jeke tulǵalardyń zańsyz qyzmetiniń nátıjesinde oryn alady. Tutastaı, qanttyń ortasha baǵasy shamamen 480-490 teńge bolýǵa tıis», degen bolatyn Á.Smaıylov.
Bárin aıt ta, birin aıt. Jekelegen dúkenderdi qaıdam, mysaly Semeıdegi kóterme jáne bólshek saýda oryndarynyń ózinde qant baǵasy 700-800 teńgeniń aralyǵynda satylyp jatyr.
SEMEI