Búgin Premer-Mınıstr Álıhan Smaıylov jumys saparymen Qaraǵandy oblysyna bardy, dep habarlaıdy Egemen.kz.
Álıhan Smaıylov óńirde birqatar ónerkásiptik, ınfraqurylymdyq jáne áleýmettik nysandardy aralap, Temirtaý jáne Saran qalalarynda jańa jobalardyń iske asyrylý barysymen tanysady. Sondaı-aq Qaraǵandy oblysynyń keshendi áleýmettik-ekonomıkalyq damýy jóninde keńes ótkizý josparlanǵan.
Úkimet basshysy óńirde birinshi kezekte Nur-Sultan jáne Almaty qalalaryn baılanystyratyn «Ortalyq-Ońtústik» halyqaralyq tranzıttik dáliziniń bir bóligi «Qaraǵandy-Balqash-Saryshaǵan» avtojolyn (1492,4-2005 km ýchaskesi) rekonstrýksııalaý barysymen tanysty.
«QazAvtoJol» UK» AQ basqarma tóraǵasy Meıirhat Qasymbaevtyń derekteri boıynsha, joba 2023 jyldyń jeltoqsanynda tolyq aıaqtalady.
Onyń aıtýynsha, bıyl jol jamylǵysynyń qurylymdyq qabattaryn tóseý, jasandy qurylystardy montajdaý jáne jol-qurylys materıaldaryn daıyndaý jumystary jalǵasady. Máselen, respýblıkalyq mańyzy bar «Qaraǵandy-Balqash» jáne «Balqash-Býrylbaıtal» avtojoldarynda keń aýqymdy jol-qurylys jumystary júrgizilýde. Jumystar barlyq 8 ýchaskede qaıta bastaldy.
Sonymen qatar kólik qozǵalysy aınalma jáne topyraq tóselgen joldarmen júzege asyrylatyn ýchaskelerdiń sanyn qysqartýǵa basa nazar aýdarylady. Rekonstrýksııalaý jumystary aıaqtalǵannan keıin bul trassalar tórt jolaqty I tehnıkalyq sanatqa sáıkes keledi.
«Joba jol júrý ýaqytyn aıtarlyqtaı qysqartyp, qaýipsiz jáne jaıly qozǵalysty qamtamasyz etedi. Jańartylǵan avtojol Balqash kóliniń týrıstik klasterin damytýdyń draıverine aınalady jáne jańa jumys oryndaryn qurýǵa yntalandyrady», dedi Álıhan Smaıylov.
Qaraǵandy oblysynyń ákimi Jeńis Qasymbek úkimettik delegasııa múshelerin óńirdiń jol-kólik ınfraqurylymyn damytý barysy týraly habardar etti.
Úkimet basshysy baıandamamen tanysyp, oblys basshylyǵyna birqatar tıisti tapsyrma berdi.