Kásipkerler zańmen belgilengen kedendik tólemder men salyqtardan jaltarýǵa tyrysqany anyqtaldy, dep habarlaıdy Egemen.kz Memlekettik kirister komıtetine silteme jasap.
Komıtet taýarlardy jóneltýshi eldiń eksporttyq deklarasııalarynan aqparatpen ózara almasý týraly halyqaralyq sharttardy jasasý boıynsha josparly jumys júrgizýde.
Naqty ýaqyt rejıminde taýarlardyń qunyn jáne olardyń jóneltýshi elde eksporty kezinde kórsetilgen sanyn Qazaqstannyń Kedendik deklarasııalarynda qazaqstandyq ımporttaýshylar málimdegen málimettermen salystyrý tetigi iske asyryldy.
Bul rette, deklaranttardyń taýarlar týraly jalǵan aqparat jarııalaý faktileri anyqtalýda.
«Máselen, osy jyldyń mamyr aıynda QHR-dan lıýstralar ımporttaldy. Deklarant partııanyń qunyn 11 myń dollarǵa kórsetti. Alaıda Qytaıdyń keden qyzmetinen aqparat suratylyp, olardyń málimetteri boıynsha eksport kezinde bul júktiń quny 240 myń dollardy quraǵany anyqtalǵan.
Osylaısha, ımporttalǵan taýarlardyń quny 22 ese tómendetildi, al oryndalmaǵan salyq mindettemeleriniń somasy 25 mıllıon teńgeni qurady», delingen habarlamada.
QHR-nyń keden qyzmetiniń málimetterine sáıkes, Qazaqstanǵa eksporttalatyn júkterdiń birinde «Smart-teledıdar» taýary jóneltilgen. Alaıda ımporttaýshy kedendik tólemderdi tóleýden jaltarý maqsatynda «televızııalyq qorap» taýaryn kórsetken.
Osyǵan oraı kedendik saraptama júrgizilip, Qytaıdan kelgen derekter rastaldy.
«Júrgizilgen jumystyń arqasynda aǵymdaǵy jyldyń birinshi jartyjyldyǵynda jalpy somasy 15,8 mıllıard teńge taýarlardyń kedendik qunyn tómendetý faktileriniń joly kesildi, sondaı-aq Qazaqstandaǵy ımport pen Qytaıdan eksport arasyndaǵy aıyrmashylyq 1,4 mıllıard dollarǵa deıin tómendedi. 2017 jyly bul kórsetkish 6,8 mıllıard dollarmen 59% quraǵan», dedi Memlekettik kirister komıteti.
Syrtqy ekonomıkalyq qyzmettiń keıbir qatysýshylary qabyldanǵan sheshimdermen kelispeıtinin atap ótken jón. Olar Memlekettik kirister komıtetiniń júrgizilip jatqan josparly jumysynyń bedelin túsirýge barynsha tyrysyp, zańdy túrde belgilengen tólemderdi tóleýden jaltaryp baǵýda.
Búgingi tańda Komıtet Qytaımen, Ázirbaıjanmen, Grýzııamen, Ýkraınamen, О́zbekstanmen, Iranmen, Túrkimenstanmen jáne Túrkııamen aqparat almasý týraly sharttar jasasty.
Sondaı-aq tıisti kelisim jasasý úshin Tájikstan keden qyzmetimen kelissózder júrgizilýde.
Osy baǵyttaǵy jumystar aldaǵy ýaqytta da óz jalǵasyn tabady.
Aıana Toǵanbek