Qaraǵandy oblysynda jumys sapary aıasynda Premer-Mınıstr Álıhan Smaıylov Saran qalasynyń ındýstrııalyq jáne ınfraqurylymdyq damý barysymen tanysty, dep habarlaıdy Egemen.kz Úkimet basshysynyń baspasóz qyzmetine silteme jasap.
Úkimet basshysy 2022 jyldyń sońynda iske qosylýy tıis «KamaTyresKZ» JShS jańa shına zaýytynyń qurylys alańyna bardy.
Kásiporyn josparly qýattylyqqa shyqqannan keıin ónim, sonyń ishinde avtomobılderdiń bastapqy komplektasııasy úshin Qazaqstan naryǵyna, sondaı-aq EAEO elderine jetkiziledi dep kútilýde.
Álıhan Smaıylov kásiporynnyń sabaqtas óndiristerin lokalızasııalaýdy arttyrý jáne arnaıy ázirlengen bilim berý baǵdarlamalary negizinde kadrlar daıarlaýdy jalǵastyrý qajettigin atap ótti.
Sonymen qatar oblys ákimi Jeńis Qasymbek Premer-Mınıstrdi Saran ındýstrııalyq aımaǵynyń ınfraqurylymyn damytý týraly habardar etti.
«Kóp jylǵy úzilisten keıin qalany damytý draıverleriniń biri jáne ósýdiń perspektıvalyq núktesi Saran ındýstrııalyq aımaǵyn qurý boldy. Bul jergilikti turǵyndar úshin mańyzdy, olar mundaı jobalardyń iske qosylýy qaladaǵy ómir súrý sapasyn qalaı ózgertetinin naqty kórýi tıis», dedi Úkimet basshysy.
Sodan keıin Álıhan Smaıylov jylyna 1200 birlik avtobýs shyǵaratyn «QazTehna» JShS zaýytyna bardy.
Búginde kásiporynda mektep avtobýstaryn shyǵarý jolǵa qoıylǵan, olar jańa oqý jylyna qaraı Qazaqstannyń toǵyz oblysyna beriledi. Sonymen qatar jyl sońyna deıin qoǵamdyq tasymaldaý úshin de avtobýstar shyǵarý josparlanǵan.
«QazTehna» zaýyty álemdik mashına jasaýdyń iri ókilderimen ónerkásiptik kooperasııa búkil qalany qalpyna keltirýge oń yqpal ete alatyndyǵyna mysal bola alady. Úkimet otandyq avtomobıl jasaý kásiporyndaryn odan ári keshendi túrde qoldaıtyn bolady», dedi Álıhan Smaıylov.
Sondaı-aq Premer-Mınıstrge ımportty almastyrý baǵdarlamasyn iske asyrý sheńberinde iske qosýylýy tıis «Meridian Company» JShS bolashaq turmystyq tehnıka zaýytynyń jobasy tanystyryldy.
Budan ári Álıhan Smaıylov jyl sońyna deıin paıdalanýǵa berý josparlanyp otyrǵan RTI (rezeńke tehnıkalyq buıymdar) shaǵynaýdanyndaǵy kópqabatty úılerdi qalpyna keltirý barysymen tanysty.
Jalpy Saran qalasynda turǵyn úı qurylysynyń qarqyny sońǵy úsh jyldyq kezeńde 260%-ǵa ulǵaıdy. 2022 jyly taǵy 250 páter paıdalanýǵa beriledi dep kútilýde.
«Ákimdik turǵyn úıdi iske qosý qarqynyn odan ári ulǵaıtýy, sondaı-aq qalany abattandyrýmen belsendi aınalysýy qajet», dedi Premer-Mınıstr.
Aıana Toǵanbek