Jambyl oblysynda iri kólemde esirtki tasymaldaǵan Nur-Sultan turǵyny ustaldy, dep habarlaıdy Egemen.kz.
«Qarasora-2022» respýblıkalyq jedel aldyn alý is-sharasyn ótkizý barysynda Polısııa departamenti Esirtki qylmysyna qarsy is-qımyl basqarmasynyń, patrýldik polısııa batalonynyń, PD Kınologııalyq qyzmet ortalyǵynyń qyzmetkerleri qatarynan quralǵan mobıldi top Jambyl oblysynyń aýmaǵyna kiretin jáne shyǵatyn avtokólik quraldaryn tekserý boıynsha maqsatty jumystar júrgizýde.
Osyndaı is-sharalardy júrgizý kezinde Almaty-Ekaterınbýrg respýblıkalyq mańyzy bar tas jolynyń 360-shaqyrymyndaǵy Moıynqum aýdany Shyǵanaq kentiniń janynda Nur-Sultan qalasynyń 41 jastaǵy turǵynynyń basqarýyndaǵy VAZ-21014 avtokóligin toqtatty.Teıa qyzmettik-izdestirý ıtimen birge avtokólikti tekserý barysynda kólik salonynan aq polıetılen paketi tabylyp, tárkilendi. Onyń ishinde jalpy salmaǵy 3 keli 30 gramm bolatyn gashısh tabyldy. Kúdikti óz kinásin tolyq moıyndap, Qordaı aýdanynyń ýaqytsha ustaý ızolıatoryna qamaýǵa alyndy.
«Atalǵan derekke qatysty Qazaqstan Respýblıkasy Qylmystyq kodeksiniń 297-baby 3-bóligi (Esirtki zattaryn ótkizý maqsatynda asa iri mólsherde zańsyz saqtaý múlki tárkilenip, on jyldan on bes jylǵa deıingi merzimge bas bostandyǵynan aıyrýǵa jazalanady) boıynsha sotqa deıingi tergeý amaldary bastaldy. Qazirgi ýaqytta atalǵan qylmysqa basqa da tulǵalardyń qatystylyǵyn anyqtaý boıynsha jedel-tergeý is-sharalary júrgizilýde», dedi Jambyl oblysynyń Polısııa departamenti Esirtki qylmysyna qarsy is-qımyl basqarmasynyń bastyǵy Asqar Jumabekov.