Qazaqstanda maýsym aıynda zaýyttardyń jedel derekterine sáıkes, qant óndirisi shamamen 38 myń tonnany qurady, onyń ishinde Taraz qant zaýyty – 18 myń tonna, Kóksý zaýyty – 9 myń tonna, Merki qant zaýyty – 11 myń tonna, dep habarlaıdy Egemen.kz Aýyl sharýashylyǵy mınıstrligine silteme jasap.
Maýsym aıynda úshinshi elderden bajsyz ákelýge arnalǵan kvota sheńberinde 23,5 myń tonna ónim ımporttaldy. Ákimdikterdiń derekteri boıynsha maýsym aıynyń basynda qorlardaǵy kólem 28,9 myń tonnany qurady.
Aýyspaly qor shilde aıynyń basynda 27,2 myń tonnany kórsetti.
Zaýyttardyń derekterine sáıkes, shildede 37 myń tonna qant óndirý josparlanyp otyr, al onyń ımporty 39,7 myń tonna bolady dep kútilip otyr.
Buǵan qosa, 11 shildedegi kórsetkish boıynsha respýblıkadaǵy qant qory 26,8 myń tonna.
QR Aýyl sharýashylyq mınıstrligi ónimmen qamtamasyz etý úshin 250 myń tonna kóleminde qant pen quraq shıkizatyn bajsyz ákelýge kvota bóldi, qalǵan 100 myń tonnany bólýge ótinimder qabyldanyp jatyr. Kvotalardyń qoldanylý merzimi 31 qazanǵa deıin uzartylyp, tórt jumys toby qurylyp (zaýyttar, oblys ákimdikteri, QR QM MKK, «QTJ» UK» AQ) sheńberinde qant kólemderin óńirlerge jedel bólý júzege asyrylady, qant óndirý men jetkizýdiń apta saıynǵy kestesi pysyqtalyp otyrady. Sondaı-aq óńirlerdiń qantpen qamtamasyz etilýine monıtorıng júzege asyrylady, júkti ýaqtyly kedendik resimdeý júzegizilip, toraptyq stansııalarda turyp qalýdy boldyrmaý maqsatynda qant pen shıkizatty tasymaldaý prosesi qadaǵalanady.
Sondaı-aq Úkimet otandyq qant naryǵyndaǵy jaǵdaıdy turaqtandyrý jónindegi bes jyldyq kezeńge arnalǵan is-sharalar josparyn maquldady, oǵan jospar aıasynda qant qyzylshasyn egý alańdaryn ulǵaıtý, sýarý jelilerin qaıta qurý jáne salý, qant zaýyttaryn jańǵyrtý, ishki naryqty qorǵaý, memlekettik qoldaý sharalaryn kórsetý jónindegi is-sharalar kiredi. Sonymen birge, qant qyzylshasyn qaıta óńdeýge ótkizýdi sýbsıdııalaý normatıvi ulǵaıtylady, quraq shıkizatynyń ımporty kezinde QQS-ty nólge túsirý jáne qyzylsha qantyn óndirýge QQS-ty 70% - ǵa tómendetý jáne quraq qantyna osy jeńildikti taratý boıynsha jeńildiktiń qoldanylý merzimin uzartý.
Osylaısha, Qazaqstannyń aýyl sharýashylyǵy mınıstrliginde ishki naryqty qantpen qamtamasyz etý úshin pármendi sharalar qabyldanýda.