Mádenıet jáne sport mınıstri Dáýren Abaev 2024 jyly Parıjde ótetin Olımpıadaǵa daıyndyq máseleleri jóninde keńes ótkizdi. Is-sharaǵa Ulttyq Olımpıada komıteti, sport federasııalarynyń basshylary, jáne memlekettik jattyqtyrýshylar qatysty, dep habarlaıdy Egemen.kz.
«Olımpıada nátıjesi – kásibı daıyndyǵymyzdyń kórsetkishi bolmaq. Oǵan federasııa basshylary, jattyqtyrýshylar, bapkerler, tıisti sala mamandary jáne men – barlyǵymyz jeke-jeke jaýaptymyz», dedi Dáýren Abaev.
Mınıstr sportshylardy daıarlaý júıesinde túıitkildi máseleler bar ekenin aıtty jáne olardy sheshý maqsatynda atqarylyp jatqan jumystarǵa toqtaldy. Máselen, Úkimet tarapynan sporttyq ınfraqurylymdy damytýdyń jospar-kestesi ázirlendi. Bıyl Almaty, Atyraý, Qaraǵandy, Qyzylorda, Pavlodar jáne Soltústik Qazaqstan oblystarynda 10 dene shynyqtyrý-saýyqtyrý keshenin salý josparlanǵan.
Mádenıet jáne sport mınıstri Dáýren Abaev elimizdegi 25 jeńil atletıkalyq manejdiń tek birnesheýi ǵana jalpy talaptarǵa saı ekenin aıtty. Al 367 júzý basseıniniń tek ekeýinde halyqaralyq talaptardy eskere otyryp jarystardy ótkizýge bolady.
Mınıstr Ulttyq qurama komandalar múshelerin daıarlaýdy qamtamasyz etý máselelerine de toqtaldy. Shilde aıynan bastap respýblıkalyq sport kolledji bazasynda kúres túrleri boıynsha jattyǵý ortalyǵynyń jumysy pılottyq rejımde iske qosylsa, K.Ahmetov atyndaǵy respýblıkalyq olımpıadalyq rezerv mektep-ınternat-kolledji bazasynda Dzıýdo akademııasy ashyldy.
Taǵy bir jańalyq – 2022 jylǵy 1 shildeden bastap 2024 jylǵa deıin sport tóreshileriniń jumysyna aqy tóleý kezeń-kezeńimen 100%-ǵa artady. Sport salasynda tóreshilerge aqy jarystyń ár kúni úshin tólenedi. Bıyl aqy kólemi 2600 teńgeden 8000 teńgege deıin, al 2023 jyly – 13 myń teńgege deıin, 2024 jyly – 17 myń teńgege deıin kóbeıetin bolady.
Budan basqa 2022 jylǵy 1 shildeden bastap Olımpıada, Paralımpıada, Sýrdlımpıada chempıondary men júldegerleri jáne olımpıadalyq sport túrleri boıynsha álem chempıondaryn daıyndaǵan jattyqtyrýshylarǵa ómir boıy aı saıynǵy materıaldyq qamtamasyz etý mólsheri 24 AEK-ten 100 AEK-ke deıin ulǵaıtyldy. Iаǵnı, olar endi aı saıyn ortasha eseppen 73 myń teńge emes, 318 myń teńge alyp otyratyn bolady.
Sondaı-aq mınıstr Dáýren Abaev kadrlyq qamtamasyz etý máselesine erekshe nazar aýdardy.
«Búginde elimizde 13 700 jattyqtyrýshy jumys isteıdi. Olardyń tek 4% ǵana jyl saıyn biliktilikti arttyrý kýrstarynan ótip júr. Keıbir federasııalar tipti jattyqtyrýshylardy attestattaý boıynsha jumys júrgizbeıdi. Sondyqtan federasııalar osy baǵyttaǵy jumysty jandandyrýy qajet», dedi mınıstr.
Aıta ketý kerek, Olımpıadada sportshylarymyz sátsiz óner kórsetkennen keıin bıyl 28 jattyqtyrýshy qyzmetinen bosatyldy.
Mınıstrdiń aıtýynsha qazirgi ýaqytta jattyqtyrýshy-oqytýshylardyń aılyǵyn kóterý jáne aptalyq saǵattyq júktemesin 18 saǵatqa deıin tómendetý baǵytynda jumys júrgizilip jatyr.
Otandyq sporttyń ǵylymı-medısınalyq bazasyn nyǵaıtý turǵysynda Dáýren Abaev respýblıkalyq taldaý ortalyǵynyń mártebesin kúsheıtý, onyń ishinde qyzmetkerlerdiń eńbekaqysyn arttyrý boıynsha jumys bastalǵanyn da aıty.
«Bul ortalyq múddeli organdarmen birlesip, sportshylardyń fızıologııalyq jaı-kúıin, medısınalyq turǵyda jan-jaqty qamtamasyz etilýin, jaraqattaný deńgeıin jáne t.b. eskere otyryp, olardyń oıyn nátıjelerin taldaý negizinde joǵary jetistikter sportyn damytýmen aınalysatyn bolady», dep atap ótti mınıstr.
Sondaı-aq sport dárigerleriniń eńbekaqysyn arttyrý, arnaıy mamandardy shaqyrý, zamanaýı jabdyqtardy satyp alý, sportshylardy tamaqtandyrý normalaryn bekitý, farmakologııalyq qamtamasyz etý tizbesin jańartý máselesi talqylandy.
Keńes qorytyndysy boıynsha Dáýren Abaev federasııalarǵa olımpıadalyq sıklge arnalǵan keshendi-maqsatty baǵdarlamany jáne dene shynyqtyrý-sport uıymdaryna sport túrleri boıynsha daıarlyq baǵdarlamasyn ázirlep, bekitýdi tapsyrdy.