Eýrazııalyq ekonomıkalyq odaq aýmaǵy ınfraqurylymyn jandandyrý kerek

ASTANA. 29 sáýir. Memleket basshysy Nursultan Nazarbaev M.V.Lomonosov atyndaǵy Máskeý memlekettik ýnıversıtetinde júrgizgen «Eýrazııalyq odaq ıdeıasynan – eýrazııalyq ıntegrasııanyń jańa perspektıvalaryna» atty dárisinde Eýrazııalyq ekonomıkalyq odaq aýmaǵynyń ınfraqurylymy jalpyqurlyqta  jetekshi orynda bolýy tıis dedi. Bul týraly egemen.kz tilshisi habarlady.

Nursultan Nazarbaev Eýrazııalyq ekonomıkalyq odaqtyń ınfraqurylymyn damytýdyń mańyzdylyǵyna toqtala kelip, birtutas eýrazııalyq telekommýnıkasııalar jelisin qurý, Mınsk – Máskeý – Astana – Almaty baǵyty boıynsha júrdek temir jol magıstralyn salý, qazirgi bar, ásirese, batysta – eýropalyq, shyǵysta –qytaılyq kólik júıelerine shyǵatyn avtomobıl jáne temir joldar jelisin jańǵyrtý, sondaı-aq, «Eýrazııa» arnasynyń «Kaspıı-Qara teńiz» jobasyn júzege asyrý qajettigin aıtty. Budan bólek, Prezıdent: «Kelisilgen jáne birkelki tarıfter boıynsha búkil ulttyq ekonomıkalardy gazben qamtamasyz etetin Biregeı ishki gaz tasymaldaý jelisin qurýdyń bolashaq eýrazııalyq ekonomıkanyń beriktigi úshin mańyzy zor. Energetıka keshenin tereń ıntegrasııalaýdyń jol kartasy retinde birlesken «Eýrazııalyq energetıka» baǵdarlamasyn ázirlep, qabyldaý qajet. Sondaı-aq, Reseımen birlesip, bizde AES salýǵa tıispiz», – dedi. Joldybaı Bazar. Derekkóz: egemen.kz. Foto: Vesti.ru.