«Astana Balet» teatry toǵyzynshy maýsymynyń shymyldyǵyn «Orfeı men Evrıdıka» bir aktili baletiniń premerasymen japty. Bas dırıjer Arman Orazǵalıevtiń jetekshiligindegi sımfonııalyq orkestrdiń súıemeldeýimen ótken spektakldi horeograf Krıstına Polın qoıdy.
«Orfeı men Evrıdıka» baleti óziniń syrshyl sazdy áýenimen, júrek pernesin túrtip, sezim syryn sherter názik te sulý mýzyka men bıdiń sátti úndesýimen erekshelenedi. Qoıylym Sergeı Prokofev, Edýard Ýılıam Elgar, Georg Frıdrıh Gendel, Devıdson Djakonello syndy kompozıtorlardyń ásem áýenderimen súıemeldengen. Al kostıým boıynsha sýretshi Dennıs Peshkeniń sahnalyq kıimderinde áıgili mıftiń sımvolıkasy shynaıy kórinis tapsa, ssenograf Otto Býbenıchektiń dekorasııasynda taýǵa uqsaıtyn birkelki emes, aınaly geometrııalyq keskinder qoldanyldy. Munyń barlyǵy spektakldiń shyraıyn ashyp, kórkin kirgizgeni anyq. Degenmen, eń bastysy, horeografııa men astanalyq teatr ártisteriniń sheberligi kórermenin aıryqsha tánti etti.
– Sahnadaǵy áreket – shyǵarmashylyq qııaldyń jemisi ǵoı. Sondyqtan da men ózimniń qoıylymdaryma únemi grek mıfologııasynyń keıipkerlerin kiriktirgendi unatamyn. Áıtse de, mıftiń mazmunyn, sonymen qatar keıipkerlerdiń minez-qulqyn sál-pál ózgertemin. Men úshin, eń bastysy – spektakl mazmunyn bıshilerdiń qımylymen jetkize bilý. Iаǵnı, kostıým, dekorasııa, ózge de sahnalyq bezendirýdi meılinshe az qoldanýǵa tyrysamyn. Mańyzdysy – bı arqyly kóńil kúı yrǵaǵyn jetkizý, dedi premeradan keıin qoıylym týraly oıymen bólisken qoıýshy-horeograf Krıstına Polın.
Orfeıdiń rólin jetekshi solıst Súndet Sultanov pen birinshi solıst Ýeslı Karvalo, mýza ári Orfeıdiń súıiktisin jetekshi solıst Aınur Ábilǵazına men Tatıana Ten, al kemtalant jazýshy Arısteıdiń beınesin daryndy bıshiler Erqanat Ermaǵambet pen Eldar Sársembaev somdady.
Sonymen qatar jańa qoıylymǵa Ilıa Manaenkov, Nazerke Aımuhametova, Darına Qaırasheva, Baıqadam Túnǵatarov, Artýr Edson, Natalıa Fernandes-Menes, Ańsaǵan Kóbentaı, Anar Dúkıeva, Aqqalı Turǵalı, Nurzat Berikqazyuly jáne Serik Amanjol syndy teatr ártisteri qatysty.
Maýsymjabar kórikti keshtiń ekinshi bóliminde astanalyq kórermen nazaryna usynylǵan cheh eliniń aty ańyzǵa aınalǵan pálsapashy-horeografy Irjı Kılıannyń «Joldan taıǵandar» baleti sımfonııalyq orkestrdiń urmaly aspaptar tobynyń súıemeldeýimen oryndaldy. Ǵajaıyp Kılıan horeografııasy men suńǵyla Stıven Raıhtyń daýylpaz kompozısııasynyń shyǵarmashylyq úndestiginiń jemisi – sahnadaǵy segiz balerınanyń qalyqtaǵan qımylynan-aq bilinip, sezilip turdy. Horeoraftyń týyndysy áýezdiligimen, monohromdy estetıka jáne oryndaýshylyqtyń álemdik deńgeıimen erekshelendi.
– Bıylǵy teatr maýsymy gastroldik saparlar jaǵynan da, túrli jobalar jaǵynan da óte mazmundy boldy. Premeralyq qoıylymdar, sonymen qatar repertýardaǵy úzdik spektaklder kórermen nazaryna usynyldy. «Orfeı men Evrıdıka» baletiniń premerasy da oıdaǵydaı ótti. Kórermen zor yqylasyn, qoshemetin bildirdi. Teatr súıer qaýymnyń arqasynda bizdiń de tynysymyz ashylyp, tyń dúnıeler shyǵarýǵa talpynyp, shabytqa bólenip, asa mártebeli kórermenderimizben qaıta qaýyshý úshin aldaǵy teatr maýsymyn asyǵa kútetin bolamyz, dep teatr dırektory Aleksandr Sovostıanov maýsymjabar óner oqıǵasyn túıindedi.
Mádenıet jáne sport mınıstrliginiń qoldaýymen ótken teatrdyń jańa týyndysyna tánti bolǵan kórermen spektakl sońynan jemisti jumys atqarǵan shyǵarmashylyq topqa zor qoshemetin bildirip, tolassyz shapalaǵyn jaýdyrdy.