Elordada jańa formattaǵy ınnovasııalyq joǵary oqý orny salynbaq. Keshe sol ýnıversıtettiń kapsýlasy qalandy. Salatanatty rásimge Premer-Mınıstrdiń orynbasary Eraly Toǵjanov, Joǵary bilim jáne ǵylym mınıstri Saıasat Nurbek, BI Group jáne provost Stıven Hanson bastaǵan Mıchıgan shtatynyń ýnıversıteti delegasııasynyń músheleri qatysty.
Memleket basshysy Qasym-Jomart Toqaev jyl basynda 2025 jylǵa qaraı Qazaqstanda kem degende 5 ozyq sheteldik joǵary oqý oryndarynyń fılıalyn ashýdy tapsyrǵan bolatyn. Osyǵan oraı elimizde jańa ýnıversıtet boı kótermek. Jobany júzege asyrýǵa QS 2022 pándik reıtıngi jáne Shanhaı ARWU boıynsha AQSh-tyń úzdik 10 bilim berý uıymynyń qataryna kiretin Mıchıgan ýnıversıteti seriktes bolyp otyr. Bul sheteldik JOO negizinen bilim berý, qurylys jáne sáýlet salalarynda halyqaralyq deńgeıdegi joǵary bilikti kadrlardy daıyndaıdy. Jańa ýnıversıtet jeke ınvestısııa esebinen salynady.
«Bıyl qańtar aıynda Prezıdent Qasym-Jomart Toqaev Qazaqstanda aldyńǵy qatarly sheteldik joǵary oqý oryndarynyń fılıaldaryn ashýdy tapsyrdy. Bul jumys qazirgi kadrlardy nyǵaıtý jáne bilikti qyzmetkerlerdiń tapshylyǵyn joıý, bilim sapasy men adamı kapıtaldy arttyrý úshin qajet. Mundaı jahandyq maqsatqa qol jetkizý bastamasyn bilim salasyndaǵy tabysty jobalar qorjyny bar BI Group holdıngi kóterdi», dedi is-sharada sóz alǵan vıse-premer Eraly Toǵjanov.
Al BI Group dırektorlar keńesiniń tóraǵasy Aıdyn Rahymbaev óz kezeginde jobaǵa qatysty oıyn:
«Biz úshin óte joǵary halyqaralyq reıtıngi bar, bilim berý jáne qurylys sııaqty mańyzdy salalardy damytýǵa eleýli úles qosa alatyn seriktes tabý mańyzdy boldy. О́tken naýryz aıynda Mıchıgan memlekettik ýnıversıtetimen yntymaqtastyq týraly kelisimge qol qoıdyq. Búginde olar elorda mektepteriniń dırektorlary men oqý isiniń meńgerýshileri úshin arnaıy biliktilikti arttyrý kýrstaryn ázirlep, sol oqýdy 2022 jyldyń 16 mamyry men 15 shildesi aralyǵynda ótkizdi. Endi Nur-Sultandaǵy jańa ýnıversıtettiń ádistemesi men oqytý baǵdarlamasy jasalady. Mundaı halyqaralyq jobany damytýdyń uzaq merzimdi perspektıvasy bar», dep jetkizdi.
Jobany úılestirýshilerdiń aıtýynsha, jańa ýnıversıtet bilikti kadrlarǵa degen joǵary suranysty eskere otyryp, bakalavrıat, magıstratýra jáne doktorantýradan basqa qysqa merzimdi úzdiksiz bilim berý kýrstaryn usynbaq. Mundaı kýrstar mamandarǵa jańa baǵyttar boıynsha sertıfıkattar men bilim alýǵa nemese biliktiligin arttyrýǵa múmkindik beredi. Sonymen qatar ýnıversıtet bilim sapasy, jańa tehnologııalar, qurylys jáne sáýlet salalarynda ǵylymı-zertteý qyzmetimen aınalysady.
Ýnıversıtet qalashyǵy Esil aýdanynda, Turan dańǵylynyń boıynda ornalasady. Jobanyń birinshi kezeńi aıasynda 2 myń oryndyq akademııalyq blok pen 500 oryndyq jataqhana salynady. Uzaq merzimdi perspektıvada barlyq qajetti ınfraqurylymy bar 20 myń stýdentke arnalǵan tolyqqandy kampýs, sonyń ishinde saıabaqtar, sporttyq-saýyqtyrý keshenderi, zerthanalar, tehnopark, bıznes-ınkýbator jáne t.b. salý josparlanyp otyr. Birinshi kezeńniń aıaqtalýy 2024 jyldyń ekinshi toqsanyna josparlanǵan.
Saltanatty rásimde qalanǵan kapsýlanyń ishinde bolashaqqa jazylǵan hat bar. Hatty keleshek urpaq 2050 jyly, ıaǵnı shamamen 30 jyldan keıin ashyp oqı alady.