«Qazposhta» qyzmeti halyq úshin

Prezıdent janyndaǵy Ortalyq kommýnıkasııalar qyzmetinde dástúrli brıfıng ótti. Basqosýdyń bul jolǵy qonaǵy «Qazposhta» AQ basqarma tóraǵasy Ashat Beısenbaev boldy. BAQ ókilderimen kezdesýinde ulttyq poshta operatorynyń basshysy Elbasy N.Nazarbaevtyń «Qazaqstan – 2050: bir maqsat, bir múdde, bir bolashaq» Joldaýyn júzege asyrý barysynda atqarylyp jatqan is-sharalar jaıynda baıandady. «Qazaqstannyń áleýmettik-ekono­mıkalyq damýyna, otandastarymyzdyń ál-aýqatynyń jaqsarýyna óziniń súbeli úlesin qosýshy, 22 myńnan astam adamnyń basyn biriktirgen, kóptegen alyp shaharlar men aýyldy eldi mekenderde poshta jáne qarjy qyzmetin kórsetýde senimdi operator retinde ózin tanytyp úlgergen kompanııada strategııalyq memlekettik qujat belsendi túrde talqylanyp, nasıhattalýda. «Qazposhta» AQ basshylyǵy kompanııanyń strategııalyq mańyzdy tapsyrmalaryn aıqyndaǵanda, eń aldymen buqara halyqtyń muqtajyn eskeredi», dedi «Qazposhta» AQ basqarma tóraǵasy Ashat Beısenbaev. Sondaı-aq ol «Biz, shyn máninde árbir qazaqstandyqtyń, sonyń ishinde, ásirese, aýyl turǵyndarynyń ómirin jaqsartýdy kózdeımiz. Bizdiń qysqa merzimdi josparlarymyzda aýyl turǵyndary úshin memlekettik qyzmetter, katalog boıynsha taýarlarǵa tapsyrys berý, saqtandyrý qyzmeti, brokerlik qyzmet, nesıeleý syndy ózge de asa qajetti qyzmet túrlerin kórsetý bar», dep atap ótti ol. Osy rette, aýyldyq poshta bólim­sheleriniń damýyna kompanııanyń jalǵyz aksıoneri «Samuryq-Qazyna» qorynyń kómegi aıtarlyqtaı kóp bolǵan. 2013 jyly qor tarapynan aýyldyq poshta bólimshelerin tehnıkalyq turǵydan kúsheıtý jobasynyń júzege asyrylýyna 1,6 mıllıard teńge kóleminde qarajat bólinip, atalǵan qarajat 64 dana brondalǵan avtokólikter, 114 dana jyljymaly poshta bólimshelerin, 723 seıfter satyp alýǵa jumsalypty. Sonymen birge, «Halyqtyq IPO» baǵdarlamasyn sátti júzege asyrý sheńberinde qor kadrlardy oqytýǵa, tehnıkalyq jabdyqtaýǵa, baǵdarlamalyq qamtamasyz etý men aqparattyq-marketıngtik ónimderdi jáne de 3231 kompıýter satyp alýǵa 487 mıllıon teńge kóleminde qarjy bólgen. Sondaı-aq, qor tarapynan 2014 jyly kassalyq toraptaryn jańǵyrtýǵa 917 mıllıon teńge bólýi josparlanǵan. Joldaýdy júzege asyrýdyń jalpy­ult­tyq is-sharalar josparyndaǵy teńdestirilgen jalaqyny kóterý máselesi ózekti taqyryp bolyp tabylsa, óz kezeginde «Qazposhta» AQ Memleket basshysynyń tapsyrmasyn, óndiristik jumysshylarǵa jalaqylaryn 12 paıyz, ákimshilik qyzmetshiler jalaqylaryn 7 paıyz kóterý arqyly oryndap shyqty, al 2014 jyldyń 1 sáýirinen bastap óndiris salasynyń barlyq jumysshylarynyń jalaqysyna 10 paıyz kóleminde ústeme qarjy qosylady. Jalpy alǵanda, «Qazposhta» AQ sońǵy 2 jyldaǵy jumysshylar jalaqysynyń jıyntyq ósimi 32 paıyzdy quraǵan. Al, óz kezeginde kompanııa menedjmenti budan ári qaraı da jumysshylardyń jalaqy deńgeıin ortasha respýblıkalyq kórsetkishke jetkizý baǵytynda jumystar atqarmaq. Joldaýdaǵy Prezıdent tapsyr­malarynyń biri múmkindigi shekteýli azamattarǵa tıisinshe kóńil bólý máselesi bolyp tabylady. Osyǵan baılanysty Ashat Beısenbaev «atalǵan azamattar sanatyna teń quqyqtar qamtamasyz ete otyryp, kvotalardy kóbeıtý biz úshin basty basymdyqtardyń biri bolyp sanalady. Osy rette biz, korporatıvtik áleýmettik basty qaǵıdalarǵa súıene otyryp, kompanııada 110 múmkindigi shekteýli adamdarǵa arnalǵan «kedergisiz aımaqty» jasadyq dep atap ótti. Poshta mekemesiniń basshysy óz baıandaýynda kóliktik ınfraqurylym salasyn damytý isine kóp kóńil bóletindikterin, onyń sebebi, ulttyq poshta operatory úshin logıstıkalyq operasııalar óndiristik úrdistiń quramdas bir bóligi ekendigin de nazardan tys qaldyrmady. Zamanaýı poshta ındýstrııasy qazirgi tańda túbegeıli ózgerister ústinde desek, qaǵaz jóneltilimderiniń ájeptáýir qysqarýy men elektrondy kommersııa salasy damýynyń nátıjesinde sálemdemelik jóneltilimder kóleminiń edáýir ósýin eskere otyryp, ulttyq posh­ta operatorlarynyń dástúrli bıznes-modelderi qaıta qurylýda. «Batys Eýropa – Batys Qytaı» halyqaralyq dálizi avtokólik baǵyttaryn keńeıtip, temirjol kóliginen aqyryndap alystaý sııaqty qosymsha múmkindikterge jol ashqan. Bul poshta jóneltilimderiniń baqylaý ýaqyttaryn qysqartyp, osy baǵyttaǵy logıstıkalyq shyǵyndardy ońtaılandyrýǵa jaǵdaı týǵyzady. Ábdirahman QYDYRBEK, «Egemen Qazaqstan».