Parlament Májilisinde Túrki tildes memleketter Parlamenttik Assambleıasy Quqyqtyq máseleler komıssııasynyń kezekti úshinshi otyrysy ótti, dep habarlady osy palatanyń baspasóz qyzmeti.
Májilistiń Halyqaralyq ister, qorǵanys jáne qaýipsizdik komıtetiniń tóraǵasy Máýlen Áshimbaev otyrysqa qatysyp, Túrkitildes memlekettermen yntymaqtastyqty odan ári damytý, ony jańa deńgeıge kóterý Qazaqstannyń syrtqy saıasatynyń negizgi basymdyǵy ekenin aıtty. «Túrkııa, Ázerbaıjan, Qyrǵyzstan jáne basqa da túrki tildes memleketter Qazaqstan úshin eń jaqyn baýyrlas elder bolyp tabylady. Bizdiń tegimiz, dinimiz, tilimiz bir, dástúrimiz ortaq. Sondyqtan da, bizdiń aramyzdaǵy qarym-qatynastyń tyǵyz bolýy zańdy», dedi komıtet tóraǵasy.
Jıyndy Májilistiń Zańnama jáne sot-quqyqtyq reforma komıtetiniń múshesi, TúrkPA komıssııasynyń quqyqtyq máseleler boıynsha tóraǵa orynbasary Nurlan Ábdirov júrgizdi.
Ol búgingi kún tártibinde TúrkPA jumysyn jetildirý máselesi ózekti bolyp otyrǵanyn atap ótti. Kún tártibiniń negizgi bóligi – «TúrkPA-ǵa múshe elderdiń ulttyq zańnamany úılestirýdegi áreketi» atty taqyryp boldy. «TúrkPA-nyń Is basyndaǵy tóraǵasy – Túrkııa parlamenti eksperttik jıyndar ótkizý dástúrin bastady. Atap aıtqanda, naýryz aıynda Ankarada ekspertterimiz korrýpsııamen kúres jáne memlekettik basqarýdy jetildirý salasynda zańnamany jaqsartýǵa qatysty semınar ótkizdi. Budan basqa, 9 sáýirde TúrkPA-ǵa múshe elder parlamentterindegi áleýmettik jáne densaýlyq máselelerimen aınalysatyn komıtetter músheleri bas qosyp, óte paıdaly kezdesý ótkizdi jáne de atalǵan kezdesýdi jyl saıyn ótkizip turý usynylýda. 18 naýryzda ekspertterimiz kezdesip, TúrkPA aıasynda ulttyq zańnamalardy úılestirý máselesin talqylady.
TúrkPA-ǵa múshe keıbir elderdiń TMD ınstıtýttary aıasyndaǵy jumys tájirıbesi bar, al Túrkııa bolsa, Eýroodaqpen yntymaqtastyq aıasynda zańdardy úılestirýde mol tájirıbege ıe. Sondyqtan da, TúrkPA aıasynda ekspertterdiń qatysýymen is-sharalar ótkizý bizdiń uıymnyń eksperttik áleýetin ulǵaıta túspek.
Basqosýda «TúrkPA-ǵa múshe elderdiń zańnamany úılestirýdegi áreketi» atty taqyrypta Májilis depýtaty Nurlan Ábdirovtiń baıandamasy tyńdalyp, TúrkPA-nyń zańdyq-quqyqtyq bazasyn jetildirý týraly másele qaraldy. Sondaı-aq, TúrkPA komıssııalary jumysyn qaıta qurý jóninde Túrkııa Uly Ulttyq jınalysynyń depýtaty Gıýzel Ýlkerdiń usynysy talqylandy.
Qyrǵyz Respýblıkasynyń TúrkPa hatshylyǵy týraly erejelerge qatysty Qyrǵyz Respýblıkasy Jokorký Keneshiniń depýtaty Qurmanbek Dyıqanbaevtyń usynysyn tyńdap, ol jóninde delegasııalardyń pikirin bildi.
TúrkPA Hatshylyǵynyń Bas hatshysy Jandos Asanov komıssııanyń 4-shi otyrysynyń merzimi men ótetin jerin jáne kún tártibi jaıynda málimdedi.