Senator Dana Nurjigit jumys sapary aıasynda Qyzylorda oblysynyń birqatar óńirin aralap, jergilikti halyqpen kezdesip, palata qabyrǵasyndaǵy jumystar baǵyty týraly baıandady. Ol Qazaly aýdanyna qarasty Laqaly aýylynda bolyp, onyń jaı-kúıimen tanysty.
Depýtat aýyl ortalyǵynda ornatylǵan «Qurmet alańynyń» ashylýynda bolyp, mundaǵy jańadan salynǵaly jatqan meshittiń alǵashqy irgetasyn qalaý rásimine qatysty. Sondaı-aq senator aýyl turǵyndarymen erkin formattaǵy kezdesý ótkizdi, dep habarlady Senattyń baspasóz qyzmeti.
Senator Rysqalı Ábdikerov Qaraǵandy oblysyna jumys sapary aıasynda Nura jáne Shet aýdandarynyń turǵyndarymen kezdesti. Sonymen qatar Qaraǵandy, Saran jáne Temirtaý qalalaryndaǵy áleýmettik mańyzy bar nysandardy aralady. Kezdesý barysynda depýtat jerlesterine Palatanyń zań shyǵarý jumystary týraly jan-jaqty aıtyp berdi. Aýdan turǵyndary óz kezeginde senatorǵa baılanys pen ınternetke qoljetimdilik máselelerin kóterdi. Depýtat azamattardy tolǵandyr- ǵan barlyq suraqqa jaýap berip, kóterilgen máseleler men usynystar jeke baqylaýǵa alynatynyn jetkizdi. Qalalardyń áleýmettik mańyzy bar nysandarynyń qyzmetkerlerimen kezdesýde senator Konstıtýsııalyq reformalar men Memleket basshysynyń reformalaryn júzege asyrýǵa baǵyttalǵan Parlamenttiń aldaǵy zań shyǵarý jumystary týraly da aıtty.
Senat depýtaty Bekbolat Orynbekov Taraz qalasynda saparda bolyp, birqatar nysannyń jumysymen tanysty. Senator «Araı-2» shaǵyn aýdanyndaǵy áleýmettik dúkende, «Araı» jáne «Baryshan» turǵyn alqaptaryndaǵy mektepterde, aýdandyq jylytý qazandyǵynda (RK-4), 200 oryndy onkologııalyq aýrýhanada, 150 oryndy ońaltý ortalyǵynda, 15 shaǵyn aýdanynda jáne Talas ózeniniń jaǵalaýynda bolyp, nysandardyń jaǵdaıymen tanysty. Depýtat mektep, ońaltý ortalyǵy qurylystaryn jáne ózen jaǵalaýyn bekitý jumystaryn merziminde ári sapaly aıaqtaýǵa nazar aýdardy. «Tarazenergoortalyǵy» AQ-nyń apatty jaǵdaıdaǵy murjasyn jóndeý, aýdandyq qazandyq mańynan qosalqy qazandyq salý máselelerin qarastyrý kerek ekenin aıtty.
Senat depýtaty Olga Býlavkına jumys sapary barysynda Shyǵys Qazaqstan oblysynyń Shemonaıha aýdanynda boldy. Depýtat Rýlıha aýylyndaǵy taýarly-sút fermasy men Prýggerovo aýylyndaǵy sý qubyry jelileriniń qurylysymen tanysty. Prýggerovo aýylynda bolǵan kezde senator jalpy quny 464 mıllıon teńgeden asatyn sý qubyry qurylysynyń barysyn kórdi. Qazir qubyrdyń qurylysy aıaqtalýǵa jaqyn. Oblysqa sapary barysynda kóterilgen túıtkildi máselelerdiń barlyǵyn depýtat baqylaýda ustaýǵa ýáde berdi.
Senat depýtaty Narıman Tóreǵalıev jumys sapary aıasynda Batys Qazaqstan oblysy Qaztalov aýdanynyń birqatar eldi mekenin aralap, jergilikti turǵyndarmen kezdesti. Jıynǵa qatysýshylar turǵyndardyń túıtkildi máselelerin, sondaı-aq qabyldanǵan birqatar zańdy talqylady. Senator Qaztalov aýdanyndaǵy Saryqudyq, Jalpaqtal, Qaraózen, Juldyz, Qaztalovka aýyldaryndaǵy bilim berý nysandarynyń qurylys barysymen jáne joldardyń jaǵdaıymen tanysty.
Senat depýtaty Murat Baqtııaruly jumys saparymen Qyzylorda oblysynyń Jańaqorǵan aýdanynda boldy. Senator baqsha daqyldaryn óndirý barysymen tanysyp, Jaıylma aýylynyń dıqandarymen kezdesti. Qarbyz óndirisi – aýyl turǵyndarynyń jyl saıynǵy negizgi tabys kózi. Depýtat bul máselelerdi oblys dıqandarymen talqylady. Ol sondaı-aq Súttiqudyq aýyldyq okrýgindegi 800 gektar jańa sýarmaly jerdi aınalymǵa engizýge arnalǵan ınfraqurylym qurylysymen tanysty. Jumys saparynyń sońynda jergilikti atqarýshy organdarmen kezdesý barysynda oblystyń túıtkildi máseleleri talqylandy.