Parlament Senaty Tóraǵasynyń orynbasary Qaırat Ishanov pen Senattyń Ekonomıkalyq damý jáne kásipkerlik komıtetiniń hatshysy Sársenbaı Eńsegenov aımaqtarǵa saparlary aıasynda Atyraý oblysynyń Mahambet aýdanynda boldy, dep habarlady osy palatanyń baspasóz qyzmeti.
Depýtattar Beıbarys jáne Saraıshyq aýyldaryndaǵy sharýashylyqpen aınalysatyn mekemelerde bolyp, eńbekkerlerge Memleket basshysynyń «Qazaqstan joly – 2050: bir maqsat, bir múdde, bir bolashaq» halyqqa Joldaýynyń negizgi baǵyttary týraly áńgimelep berdi.
Senatorlar, sondaı-aq, kúnine 3 myń lıtr sút óndiriletin sút fermasynyń jumysymen jáne eshki súti óndiriletin «AtyraýAgroО́nimderi» sharýa qojalyǵynyń tehnologııalyq úderisterimen tanysty. Keleshekte mundaǵy eshki ósiretin sharýashylyqta 40-qa jýyq ónim óndirý josparlanyp otyr.
Senat Tóraǵasynyń orynbasary fermerlerdi elimizdegi agroónerkásip keshenin damytý úshin zań júzinde barlyq jaǵdaı jasalǵany týraly habardar etti. 2013 jyldyń sońynda Parlament depýtattary agrarlyq sektordy memlekettik qoldaýdyń zańnamalyq negizderin jasaýǵa jáne birqatar jańa tetiktermen qamtamasyz etýge, sondaı-aq, Qazaqstannyń DSU-ǵa kirerdiń aldynda básekege qabilettilikti arttyrýǵa baǵyttalǵan «Qazaqstan Respýblıkasynyń keıbir zańnamalyq aktilerine agroónerkásip kesheni máseleleri boıynsha ózgerister men tolyqtyrýlar engizý týraly» Zań qabyldanǵan bolatyn.
Odan basqa, fermerlerdi qoldaý úshin uzaq merzimdi qarjylandyrýǵa tikeleı qol jetkizýdi qamtamasyz etý arqyly olardyń aýyl sharýashylyǵynda bıznesti damytýyna belsendi túrde járdemdesý, aýyldaǵy ónim óndirýshilerdi tıimdi kepildendirý jáne saqtandyrý júıesin qurý, sondaı-aq, ótkizý naryqtaryna erkin kirýin qamtamasyz etý múmkindikteri qarastyrylyp otyr.