Fransııa tas joldarynda ótip jatqan «Týr de Frans» velojarysynyń 14-shi kezeńi aýstralııalyq Maıkl Mettıýstiń jeńisimen aıaqtaldy.
Team BikeExchange – Jayco komandasynyń veloshabandozy Maıkl Mettıýs Sent-Eten – Mand qalalaryn jalǵaǵan 192,5 shaqyrymdyq joldy 4 saǵat 30 mınýt 53 sekýndta júrip ótti. Ekinshi jáne úshinshi orynǵa ıtalııalyq Alberto Bettıol (EF Education-EasyPost) men fransııalyq Tıbo Pıno (Groupama – FDJ) ıe boldy. Olar máre syzyǵyn jeńimpazdan 15 jáne 34 sekýnd keıin kesti. Bul kezeńde «Astana» kapıtany Alekseı Lýsenko márege 34-shi bolyp jetti.
14 kezeńniń qorytyndysy boıynsha, jalpy esepte danııalyq Ionas Vıngegor (Jumbo – Visma) kósh bastap tur. Ony keıingi tórt jyldaǵy «Týr de Franstyń» jeńimpazdary slovenııalyq Tadeı Pogachar (UAE Team Emirates) men brıtanııalyq Geraınt Tomas (INEOS Grenadiers) ókshelep keledi. Al Alekseı Lýsenko úzdik ondyqtyń qatarynan shyǵyp qaldy. Qazirgi tańda ol 12-orynda tur.