Aýqymdy ister arnasy

Premer-Mınıstr Kárim Másimovtiń tóraǵalyǵymen ótken keshegi Úkimet otyrysynda Elbasynyń tapsyrmasyna sáıkes jekeshelendirýdiń ekinshi tolqynyn júzege asyrý jáne el ekonomıkasyna ınvestısııalar tartý, bızneske qoldaý kórsetýdiń birinshi kezekti sharalaryn iske qosý sekildi mańyzdy máseleler qaraldy. Qaralǵan máselelerdiń mánisin buqaralyq aqparat quraldary arqyly halyqqa jetkizý úshin Ortalyq kommýnıkasııalar qyzmetine bul joly Premer-Mınıstrdiń orynbasary – Indýstrııa jáne jańa tehnologııa­lar mınıstri Áset Isekeshev, Ekonomıka jáne bıýdjettik josparlaý mınıstri Erbolat Dosaev, О́ńirlik damý mınıstri Bolat Jámishev jáne «Samuryq-Qazyna» ulttyq ál-aýqat qory» AQ basqarma múshesi – basqarýshy dırektor Nurlan Rahmetov keldi. Áýelgi sóz kezegin alǵan Á.Ise­­ke­shev el ekonomıkasyna ınves­tısııalar tartý máselesine toqta­lyp ótti. Onyń aıtýynsha, elimizde qolǵa alynyp, qazir belsendi sıpatqa ıe bolyp otyr­ǵan ındýstrııalandyrý baǵdar­lamasyn tolyq máninde júzege asyrý úshin atalǵan másele­niń mańyzy óte úlken. Degenmen, sońǵy ýaqyttary búkil álem boıynsha alǵanda ınvestısııalyq belsendiliktiń tómendep ketken­digi anyq baıqalyp otyr. Oǵan álemniń iri óńirlerinde daǵ­da­rysty jaǵdaılardyń oryn alǵandyǵy sebep bolýda. BUU derek­teri boıynsha, tikeleı sheteldik ınvestı­sııa tartý jóni­nen Qazaqstan 2012 jyly alǵashqy 20 eldiń qataryna kirge­nimen bul máseledegi irkilis bizdiń elimizde de sezilýde. Osyǵan baı­la­nysty Memleket basshysy el ekono­mıkasyna ınvestısııa tartýǵa erekshe mán berdi. Osyǵan qolaıly jaǵ­­daı­lar týǵyzýdy Úkimetke mindet­tedi. Úkimet ınvestısııa tartýdyń keshendi josparynyń jobasyn ázir­lep, osy otyrysta qaraǵan eken. Á.Ise­keshevtiń aıtýyn­sha, otandyq ekonomıkaǵa shetel­dik ınvestısııalardy tartý jónindegi jumystar atal­ǵan josparǵa sáıkes eki baǵytta jalǵasatyn bolady. «Sonyń birinshisi – el ishindegi ınvestı­sııalyq ahýaldy odan ári jaqsar­tý. Bul baǵyt boıynsha birqa­tar yntalandyrý sharalary qoldanylmaq. Ekinshi baǵyt – iri ınvestorlardy, sonyń ishinde transulttyq kompanııalardy tartý. Bul maqsatta biz negizgi elder men salalardy aıqyndap aldyq. Qajetti sharalardyń bári belgi­lendi. Bul jospar jaqynda ǵana Prezıdent Ákimshiligine joldandy. Ol qabyldanǵannan keıin birden jumysqa kirisemiz. Bul rettegi bizdiń basty maqsatymyz – Qazaqstandy óńirdegi eń myqty habqa aınaldyrý», dedi Á.Isekeshev. Ekonomıka jáne bıýdjettik jos­parlaý mınıstri Erbolat Dosaev óz sózinde atalǵan máseleni odan ári naqtylaı tústi. Sonyń ishinde ınves­torlardy yntalandyrý úshin sharalar toptamasy ázirlengendigin aıtyp ótti. Bul sharalarda bizdiń ekonomıkamyzǵa qarjy salǵan ınvestorlarǵa olardyń shyǵynynyń bir bóligin jabý úshin kómek kórsetiletindigin atap kórsetti. Ol kómekter qýat tasymaldaýshylarǵa jáne ónimdi jetkizý boıynsha tasymaldaýǵa ketken shyǵyndardyń bir bóligin qarjylandyrý úshin kórsetilmek. Sonymen qosa, sheteldik ju­mys kúshin tartqysy keletin ınves­tor­larǵa kvotadan tys jáne ruqsat almaı-aq ınvestısııalyq jobany júzege asyrýdyń búkil kezeńinde jáne nysandy iske qosqan soń, bir jyl kóleminde sheteldik jumys kúshin tartý quqyqtary berilmek. Munyń syrtynda ınvestorlar 10 jyl merzimge deıin qosymsha qun salyǵyn tóleýden bosatylady, olarǵa nysandy iske qosqannan keıin jumsaǵan kúrdeli qarjy shyǵyn­darynyń bir bóligin óteý boıynsha memleket tarapynan ınvestısııalyq sýbsıdııa beriletin bolady. Sondaı-aq, E. Dosaev jekeshe­len­di­rýdiń ekinshi tolqynyn júzege asyrý sharalaryna da toqtalyp ótti. Onyń aıtýynsha, Úkimet otyry­synda 2014-2016 jyldarǵa arnal­ǵan jekeshelendirýdiń keshendi jos­pary sheńberinde básekelestik ortaǵa tapsyrylatyn kásiporyndar men nysandardyń tizbesi anyq­tal­ǵan. Jekemenshikke tapsyryla­tyn mundaı uıymdardyń ishinde kom­mer­sııalyq sıpattaǵy ǵylymı mekemeler, shıpajaılar, buqaralyq aqparat quraldary, kúzet mekemeleri bar. Osyndaı uıymdardy jekeshelendirý nátı­­jesinde respýblıkalyq menshik­tegi nysandar sany 28 paıyzǵa qys­qaratyn bolady. «Tutastaı alǵanda respýblıka boıynsha básekelestik ortaǵa 782 kvazımemlekettik sektor uıymdary beriledi. Olardy jekemenshikke tapsyrý ret-retimen júıeli túrde júzege asyrylady. Máselen, 2014 jyly 101 uıym, 2015 jyly – 50, 2016 jyly 26 uıym jeke sektorǵa shyǵarylady. Munyń syrtynda 380 uıymǵa qaıta qurý jumystary júrgiziledi. Olardyń keıbireýiniń joıylýy da múmkin», dep atap kórsetti E. Dosaev. «Samuryq-Qazyna» ókili Nur­lan Rahmetov osy qor boıynsha jeke­shelendiriletin uıymdar jaıy­na toqtalyp ótti. Onyń aıtýynsha, atalǵan qordan 223 uıym jeke sek­torǵa tapsyrylyp, mundaǵy kásip­oryndar sany 37 paıyzǵa deıin qys­qaratyn bolady. О́ńirlik damý mınıstri B.Jámishev bızneske qoldaý kórse­týdiń birinshi kezekti sharalaryn júzege asyrý jos­pary Úkimet otyrysynda maqul­dan­ǵandyǵyn aıtyp ótti. Onyń aıtýynsha, Memleket bas­shysy N.Nazarbaevtyń bul másele jónindegi Úkimetke bergen basty tapsyrmasy bızneske qol­daý kórse­týdi Ekonomıkalyq ynty­maq­tastyq jáne damý uıymy sekildi álemdegi eń damyǵan elderdiń basyn qosyp otyrǵan ıntegrasııalyq birles­tiktiń qaǵıdattaryna sáı­kes júzege asyrý bolatyn. Bul qaǵı­dattar 2010 jyly 15 maýsymda qabyldanǵan Bo­lon hartııasynda aıqyndalǵan. Soǵan sáıkes elimizde bızneske qol­daý kórsetýdiń birinshi kezekti sharalaryn júzege asyrý jospary 6 baǵyt boıynsha jasalynypty. Ol baǵyttar turaqty iskerlik orta qurý, shaǵyn jáne orta bıznesti damy­týdyń tıimdi sharalaryn basqa salalarda qolǵa alynǵan saıasatpen úılestirý, bilim berý men adam faktoryn damytý, jeke jáne memlekettik sektorlardyń áleýmettik áriptestigin nyǵaıtý, qarjy resýrstaryna tıimdi qoljetimdilikti qamtamasyz etý jáne jańa tehnologııalardyń damýyna qajetti orta qalyptastyrý sekildi mańyzdy mindetterdiń basyn qosady. Baspasóz máslıhatynda jýr­na­lıs­ter tarapynan birqatar suraqtar qoıylyp, olardyń barlyǵyna tyńǵy­lyqty jaýap qaıtaryldy. Suńǵat ÁLIPBAI, «Egemen Qazaqstan».