Ahmet Baıtursynulynyń 150 jyldyǵyna oraı, Qostanaı velosıped qaýymdastyǵy uıymdastyrǵan úsh kúndik velomarafon óz máresine jetti. Aldymen ult ustazynyń Qostanaıdaǵy eskertkishine taǵzym etken veloshabandozdar Áýlıekól asyp, Sholaqsaıdan keri qaıtty.
Velosıpedshiler aspandy tóńkerip jerge túsirerdeı janyp turǵan aptap ystyqqa qaramastan, arǵy-bergi joldy qosyp eseptegende, uzyndyǵy 400 shaqyrymdy júrip ótti. Ahmet eskertkishiniń basynda ótken sát sapar jıynda Parlament Májilisiniń depýtaty Samat Aqyshev sportshylarǵa aq jol tilep, atalǵan is-shara Ahańnyń alasapyran ǵumyry men ólmes murasyn dáripteýdegi, sondaı-aq buqaralyq sportty nasıhattaýdaǵy mańyzyn atap ótken.
Al oblystyq qoǵamdyq damý basqarmasynyń basshysy Marat Jurqabaev velosherýdi uıymdastyrýshylarǵa alǵys bildirip, ult ustazyna arnalǵan ulaǵatty bastamalar jyl boıy jalǵasatynyn tilge tıek etti.
Mereıtoılyq marafonǵa jıyrmadan astam kásibı veloshabandoz qatysty. Olardy 76 jastaǵy áýesqoı veloshabandoz, ardager sportshy, ǵalym-ustaz Qalqaman Jaqyp aǵa bastaǵan áýesqoı velosıpedshiler 20 shaqyrymǵa deıin uzatyp saldy.
– Ahmet Baıtursynuly – qazaq halqynyń rýhanı kósemi. Bizdiń maqsat – jastarǵa uly tulǵanyń ómiri men elge sińirgen qyzmetin, baǵa jetpes asyl murasyn nasıhattaý, – dedi sport ardageri.
Velosherýge qatysýshylardyń arasynda úshinshi toptaǵy múmkindigi shekteýli Pavel Babenkonyń da bolǵanyn aıta ketken jón. Velosportqa bala kezinen áýestengenimen, Pavel óziniń súıikti sportymen shyndap aınalysa bastaǵanyna eki-aq jyl bolypty.
– Sol aıaǵym protez. Biraq soǵan qaramastan byltyr birinshi ret 200 shaqyrymdy baǵyndyrdym. Endi, mine, 400 shaqyrymǵa jetemin dep otyrmyn. Menińshe, qımyl-qozǵalys – belsendi ómir súrýdiń kórinisi ǵana emes, sonymen qatar osy arqyly kóptegen adammen tanysyp, aralasyp-quralasyp, jańa dos tabasyń. О́mirge degen qushtarlyǵyń artady, – deıdi P.Babenko.
Sportshylar Áýlıekólde bir túnep, juma kúni Sholaqsaı eldi mekenine jetti. Ahmet Baıtursynuly atyndaǵy óńirlik ýnıversıtettiń oqytýshylary aýyl mektebiniń joǵary synyp oqýshylaryna kásiptik baǵyt-baǵdar berý jáne tulǵalyq ósý jóninen trenıngter ótkizdi. Sondaı-aq asyq atý jáne shahmat oıyndarynan jarys uıymdastyrylyp, sporttyq is-sharanyń sońy konsertke ulasty.
«Qostanaı velosıped qaýymdastyǵy» QB tóraǵasy Baýyrjan Tebeevtiń aıtýynsha, Qostanaıda uly tulǵalardyń mereıtoıyna arnalǵan velosherýler dástúrli túrde ótip turady. Máselen, 2020 jyly Abaı Qunanbaıulynyń 175, byltyr Y.Altynsarınniń 180 jyldyǵyna oraı aýqymdy velomarafondar uıymdastyryldy.
Veloshabandozdar Qostanaıǵa 16 shildede besin aýa qaıta oraldy.
Qostanaı oblysy