ASTANA. 30 sáýir. Búgin Astana ýaqyty boıynsha tańǵy saǵat 7:35-te elimizdiń jerdi qashyqtyqtan zondtaý (jerdi ǵaryshtyq qurylǵymen baqylaý) birinshi jer serigi Fransııanyń «Kýrý» ǵarysh aılaǵynan sátti ushyryldy. Bul týraly Kazakhstan Today habarlady.
KazEOSat-1 (Kazakhstan Earth Observation Satellite – qazaqstandyq Jerdi qadaǵalaý jer serigi) apparatyn Ulttyq ǵarysh agenttiginiń tapsyrysy boıynsha Fransııanyń Airbus Defence and Space kompanııasy jasap shyǵarǵan.
Barlyq salmaǵy 900 kılo tartatyn apparat ǵarysh áleminde 7 jyl jumys isteıdi.
KazEOSat-1 stıhııalyq apattar monıtorıngin túzý, aldyn alý, jer kadastryn júrgizý, qorǵanys pen eldiń qaýipsizdigin qamtamasyz etý maqsatynda jasaldy. Ol Qazaqstan aýmaǵynyń, sondaı-aq, jerdiń basqa telimderiniń kórinisterin túsirýge arnalǵan.
KazEOSat-1 qurylǵysyn kún-sınhrondy orbıtaǵa «Vega» eýropalyq zymyran tasyǵyshy alyp ushty.
KazEOSat-1-di ǵaryshqa jetkizý maqsatynda 2009 jyly jerdi qashyqtyqtan zondtaý jer serikteriniń eksporty jónindegi álemdik kóshbasshy – Airbus Defence and Space pen «Qazaqstan Ǵarysh Sapary» Ulttyq kompanııasy» Aksıonerlik qoǵamy arasynda halyqaralyq tenderlik úderis qorytyndylary boıynsha kelisim jasalǵan.
Jerdi ǵaryshtyq qurylǵymen baqylaıtyn bul apparatty qurýǵa arnalǵan Qazaqstan-Fransııa kelisim-sharty sheńberinde elimizdiń 50 ınjeneri praktıkalyq taǵylymdamynyń tolyq kýrsynan ótti. Olar jer serikti avtonomdy basqarýdy jáne ǵarysh túsirilimderin óńdeýdi meńgerdi.
«Kýrý» ǵarysh aılaǵyna Qazaqstan delegasııasyn bastap barǵan Ulttyq ǵarysh agenttiginiń tóraǵasy Talǵat Musabaev KazEOSat-1-diń sátti ushyrylǵanyna oraı Fransııanyń atalǵan sala basshylaryna, Eýropa ǵarysh agenttiginiń jetekshilerine jáne osy iske atsalysqan barlyq mamandarǵa elimizdiń atynan alǵys bildirdi.
Joldybaı Bazar.
Derekkóz: Kazakhstan Today.
Foto: «QazAqparat».