Bul kúnderi fýtboldan el chempıonatynyń joǵary jáne Birinshi lıgasynda óner kórsetetin 16 komanda tórt-tórtten tórt topqa bólinip, Qazaqstan kýbogyn sarapqa salýda. О́tken demalys kúnderi kýbok jolyndaǵy jarystyń toptyq kezeńdegi ekinshi týr oıyndary óz máresine jetti. Elimizdiń segiz qalasynda ótken matchtarda birneshe tosyn nátıje tirkeldi.
«A» tobynda óner kórsetetin byltyrǵy el kýbogynyń ıegeri «Qaırat» syrt alańda «Atyraýmen» kezdesip, asa tartysty ótken kezdesýde 3:2 esebimen jeńiske jetti. Almatylyqtar birinshi týrda Shymkenttiń «Ordabasy» komandasyn jeńse (2:0), «Atyraý» syrt alańda Pavlodardyń «Aqsýyn» utqan bolatyn – 1:0.
Toptaǵy ekinshi oıynda «Ordabasy» Shymkentte «Aqsýdan» basym tústi 2:0. Birinshi týrdaǵy sátsizdikten keıin eki klýb ta bul matchta jeńis úshin baryn saldy. Degenmen birinshi taımda ústemdik tanytqan alań qojaıyndary match taǵdyryn alǵashqy 45 mınýttyń ishinde sheship tastady. Eki týrdyń qorytyndysy boıynsha «Qaırat» alty upaımen jeke-dara kósh bastady. Úsh upaıy bar «Atyraý» men «Ordabasy» ekinshi jáne úshinshi oryndardy bólisip tur. «Aqsý» tórtinshi orynda qalyp qoıdy.
Ekinshi týrdyń sensasııasyn Birinshi lıgada óner kórsetetin «Qaısar» komandasy tirkedi. «V» tobynda synǵa túsip jatqan qyzylordalyq ujym bul týrda birer kúnnen soń Konferensııa lıgasynda oınaıtyn Petropavldyń «Qyzyljaryn» syrt alańda qapy qaldyrdy. «Qarasaı batyr» stadıonynda ótken matchta 2:1 esebi tirkeldi. Eki oıynda alty upaı oljalaǵan «Qaısar» «V» tobynyń kóshin bastady. Al «Qyzyljar» bir upaımen úshinshi oryndy qanaǵat tutýda.
Sondaı-aq alǵashqy týrda «Qaısardan» jeńilgen Oraldyń «Aqjaıyǵy» ekinshi týrda «Kaspııdi» tize búktirdi – 3:1. Úsh upaıyna qol jetkizgen «Aqjaıyq» týrnır kestesinde ekinshi orynǵa kóterilse, «Kaspıı» bir upaımen sońǵy orynda qalyp qoıdy.
«S» tobynda óner kórsetetin Qostanaıdyń «Tobyly» ekinshi týrdan keıin alǵashqy upaıyna qol jetkizdi. Birinshi týrda qostanaılyqtar syrt alańda «Tarazdan» 5:1 esebimen ońbaı jeńilgen edi. Árıne, bul kezdesýde «Tobyldyń» negizgi quram fýtbolshylary emes, jastar komandasy oınaǵan bolatyn. Al ekinshi týrda «Aqtóbemen» bolǵan matchta qosalqy quram oıynshylaryn shyǵaryp, 2:1 esebimen jeńiske jetti. Eki týrdan keıin Mılan Mılanovıch shákirtteri úsh upaımen úshinshi orynǵa jaıǵasty. Al birde-bir upaıy joq «Aqtóbe» sońǵy orynǵa túsip qaldy.
Toptaǵy ekinshi oıynynda «Taraz» óz alańynda «Maqtaaralǵa» esh múmkindik qaldyrmady. Alǵashqy týrda «Aqtóbeden» basym túsken «Maqtaaral» fýtbolshylary bul týrda «Tarazdyń» osal tusyn taba almady. Qonaqtar birinshi taımda alań ıelerine laıyqty qarsylyq kórsetip, 2:2 esebimen teń oınaǵanymen, ekinshi taımda sol nátıjeni saqtap qalýǵa shamalary jetpedi. Alty gol soǵylǵan matchta «Taraz» 4:2 esebimen jeńiske jetti. Osylaısha, eki oıynda alty upaı jınaǵan «Taraz» «S» tobynda top bastady. «Maqtaaral» úsh upaımen ekinshi orynda qala beredi.
«D» tobynyń ekinshi týrynda «Astana» Qaraǵandynyń «Shahterimen» kezdesti. «Astana Arenada» ótken oıynda jankúıerler jeti goldyń kýási boldy. 5:2 esebimen jeńiske jetken elordalyq ujym tórt upaımen birinshi orynǵa kóterildi. «Astana» alǵashqy týrda syrt alańda «Jetisýmen» teń oınap (0:0), «Shahter» óz alańynda «Turandy» 4:0 esebimen tize búktirgen edi.
«Turan» birinshi týrdaǵy iri jeńilisiniń esesin «Jetisýmen» bolǵan oıynda qaıtardy. 16-mınýtta túrkistandyq komandanyń makedonııalyq shabýylshysy Samır Fazlı esepti ashsa, 24-mınýtta tablodaǵy kórsetkishti 2:0-ge jetkizdi. Al ekinshi taımnyń orta tusynda oıyndaǵy úshinshi golyn soǵyp, het-trıktiń avtory atandy. Qorytyndy esep – 3:0. Bul jeńisten keıin «Turan» týrnır kestesinde úshinshi orynǵa kóterilip, bir upaıy bar «Jetisý» ázirge tórtinshi oryndy qanaǵat tutýda.