Quny 527,3 mln. teńge quraıtyn kontrabandalyq temeki ónimin Almaty oblysynyń salyqshylary anyqtaǵan. Bul týraly QR QM Memlekettik kirister komıtetinde málimdedi, dep habarlaıdy Egemen.kz.
«Qaskeleń qalasy, Almaty-Bishkek trassasynyń 29 shaqyrymynda ornalasqan «Krıstall» qonaq úı-turaq kesheniniń aýmaǵynda 925 myń qorap zańsyz temeki (18,5 mln. temeki tartý birligi) ónimi anyqtaldy. Aksızdik markasy joq kontrabandalyq temeki ónimi tekserý júrgizý barysynda Almaty oblysy boıynsha Memlekettik kirister departamentiniń jáne Almaty oblysy boıynsha Ekonomıkalyq tergeý departamentiniń qyzmetkerlerimen birlesip anyqtaldy», delingen komıtet habarlamasynda.
Tekserý nátıjeleri boıynsha barlyq materıaldar QR Qylmystyq kodeksiniń 233-baby boıynsha buzýshylyq belgilerimen Almaty oblysy boıynsha Ekonomıkalyq tergeý departamentine berildi.
Tólenbegen aksız shyǵyn somasy 227,6 mln. teńgeni quraıdy, temekiniń jalpy quny 527,3 mln. teńgeni qurady.
«Qylmystyq kodekstiń 233-babynyń 1-bóligine sáıkes aıtarlyqtaı zalal keltirýge ákep soqqan, aksızdeletin taýarlardy sáıkestendirý quraldarymen jáne (nemese) esepke alý-baqylaý markalarymen tańbalaýdyń tártibi men qaǵıdalaryn buzý – múlki tárkilenip nemese onsyz, belgili bir laýazymdardy atqarý nemese belgili bir qyzmetpen aınalysý quqyǵynan úsh jylǵa deıingi merzimge aıyra otyryp nemese onsyz, bir myń aılyq eseptik kórsetkishke deıingi mólsherde aıyppul salýǵa ne sol mólsherde túzeý jumystaryna ne tórt júz saǵatqa deıingi merzimge qoǵamdyq jumystarǵa tartýǵa ne bir jylǵa deıingi merzimge bas bostandyǵyn shekteýge ne sol merzimge bas bostandyǵynan aıyrýǵa jazalanady», delingen Memlekettik kirister komıtetiniń baspasóz qyzmetinde.