Erlik jasaý árkimniń qolynan kele bermeıdi. Degenmen Túrkistan óńirinde óz basyn qaýipke tigip, ózgeniń ómirin qorǵap qalǵan azamattar bar. Búgin Túrkistan oblysynyń ákimi О́mirzaq Shókeev beıbit kúnniń batyrlaryn qabyldap, qurmet kórsetti.
— Búgin biz shyn máninde naǵyz patrıot, batyl azamattarmen júzdesip otyrmyz. Sizder qazirgi jastar úshin úlgisizder. Olar otanshyldyqtyń ne ekenin sizderden úırenedi. Jalpy Túrkistan oblysynda patrıottar óte kóp. Arys apaty men Maqtaaraldaǵy sý tasqynynda oblysymyzdyń erikti jastary, patrıottary kúndiz-túni elge qyzmet etti. Ony el jaqsy biledi. Bunyń bári óńir turǵyndarynyń myqtylyǵyn, elge janashyrlyǵyn kórsetedi. Sizder turǵyndardy órtten, apattan qutqaryp, erlik jasadyńyzdar. Beıbit kúnniń batyry atanyp júrsizder. Qasıetti baıraǵymyzdy ottan alyp shyqqan baýyrymyzǵa da rahmet. Osyndaı azamattardy elge tanytyp, nasıhattaýymyz kerek. Biz sizdermen maqtanamyz, — dedi О́mirzaq Shókeev.
Batyldyq pen batyrlyqtyń úlgisin kórsetken Túrkistan oblysynyń azamattaryn oblys ákimi «Túrkistan oblysyna sińirgen eńbegi» úshin tósbelgisimen marapattady. Olardyń biri — kúni keshe ǵana erliginiń arqasynda elge tanylǵan Qanseıit Muhammed. Onyń otanshyl bolmysyn kúlli el kórdi. Saıram aýdandyq halyqty jumyspen qamtý ortalyǵynyń qyzmetkeri Aqsýkent aýylynda ornalasqan ári ózi jumys isteıtin ǵımaratta bolǵan órt kezinde shatyr ústindegi Memlekettik Týdy ottan alyp shyqqan bolatyn.
Haırýllaev Aıan Rysbekuly — Jetisaı aýdandyq polısııa bóliminiń mıgrasııa bólimshesiniń basshysy. Ol tóngen qaýipke qaramaı, beıtanys keıýanany órttiń ortasynan aman alyp shyqqan.
Nurǵalı Kerimbekov — Kentaý qalasy, №12 О́rt sóndirý bóliminiń bólimshe komandıri, azamattyq qorǵaý aǵa serjanty. О́z isiniń sheberi sý qubyryna qulap ketken 2 jastaǵy balany qutqaryp aldy.
Batyrlardyń biri Rysbek Meıirbek Nurjigituly — Qazyǵurt aýdanynyń turǵyny. Ol ájethanaǵa túsip ketken 1 jastaǵy balany qutqaryp alyp shyǵyp, eldi súıindirdi.
Batyl azamattar óńir basshysynyń iltıpatyna rızashylyq bildirip, qoǵamnyń damýyna qyzmet etýge daıyn ekenderin jetkizdi.