Memlekettik hatshy Ádilbek Jaqsybekovtiń tóraǵalyǵymen Qazaqstan Prezıdenti janyndaǵy Konsýltatıvtik-keńesshi organ – Vedomstvolyq nagradalar jónindegi geraldıkalyq komıssııanyń otyrysy ótti, dep habarlady Prezıdenttiń baspasóz qyzmeti.
Otyrysqa vedomstvolyq jáne olarǵa teńestirilgen ózge de nagradalarmen marapattaý jumysynyń jaı-kúıi, «Eńbek ardageri» medaliniń quqyqtyq mártebesin bekitý, sondaı-aq, vedomstvolyq nagradalardyń geraldıkalyq sıpattamasyn jetildirý jónindegi usynystar qaraldy.
Otyrys qorytyndysynda naqty tapsyrmalar men usynymdar berildi.
Vedomstvolyq nagradalar jónindegi geraldıkalyq komıssııa Memleket basshysynyń 2011 jylǵy 30 qyrkúıektegi №155 Jarlyǵymen qurylǵan. Onyń quramyna Prezıdent Ákimshiliginiń, Premer-Mınıstr Keńsesiniń, ózge de memlekettik organdardyń ókilderi, Parlament depýtattary, qoǵam qaıratkerleri jáne kásibı mamandar kiredi.
Komıssııanyń negizgi mindeti – vedomstvolyq nagradalardyń normatıvtik quqyqtyq aktilerin jáne olardyń geraldıkalyq sıpattamalaryn jetildirý.