Qazaqstan Prezıdenti Qasym-Jomart Toqaev Ortalyq Azııa memleketteri basshylarynyń IV Konsýltatıvtik kezdesýindegi baıandamasynda shekarada saqtalyp otyrǵan turaqsyzdyq faktorlaryn joıý – memleket kóshbasshylarynyń enshisinde ekenin aıtty, dep habarlaıdy Egemen.kz.
«Biz, memleketter kóshbasshylary retinde óńirdegi áli de saqtalyp otyrǵan turaqsyzdyq faktorlaryn barynsha joıý úshin qoldan kelgenniń bárin jasaýǵa tıispiz. Memleketaralyq shekaralardaǵy árbir atys tek sol elderde ǵana emes, búkil aımaqqa da aýyr tıetini belgili. Qazirgi daǵdarys jaǵdaıynda bizdiń memleketterimiz shekaralyq máselelerdi eńserýdiń tıimdi úlgisin kórsetýge tıis», dedi Memleket basshysy.
Prezıdent qazirgi ýaqytta shekarany zańdy túrde rásimdeý prosesi óte kúrdeli ekenin aıtty.
«Daýly máselelerdi shynaıy tatý kórshilik jáne halyqaralyq quqyqtyń irgeli qaǵıdattaryn saqtaı otyryp, tek beıbit jolmen sheshýge bolady. Basqa balama joq», dedi el Prezıdenti óz sózinde.