«Qorǵas» shekara mańy yntymaqtastyǵy halyqaralyq ortalyǵynyń jumysy áli kúnge júıelenbeı keledi. Josparlanǵan 12 jobanyń osy ýaqytqa deıin tek 3-i ǵana júzege asqan. Bul týraly Jetisý oblysynyń ákimi Beıbit Isabaevtyń Panfılov aýdanyna jumys sapary barysynda belgili boldy.
Ortalyq pandemııaǵa baılanysty 2020 jyldan beri saýda-sattyqty toqtatqan. Al jyl basynan beri kólik arqyly tek 1 myń tonna ǵana júk ótken. Jalpy, «Qorǵas» ShYHO jumysyn jandandyrý baǵytynda ınvestısııalyq jobalardy qolǵa alý kózdelip otyr. Oǵan qosa, «Qazposhta» AQ aýmaǵy 3 myń sharshy metrlik halyqaralyq poshta almasý ornyn salmaqshy. Onda kommersııalyq júkti qabyldaý, suryptaý, saqtaý, tıisti orynǵa deıin jetkizip berý máselesi tolyqtaı qarastyrylǵan.
«Qorǵas – Shyǵys qaqpasy» arnaıy ekonomıkalyq aımaǵynda biregeı qurǵaq port pen logıstıka jáne óńdeý ónerkásibi jumys isteýde. Negizinen, qurǵaq porttyń jyldyq qýattylyǵy joǵary. Konteıner aınalymyn 540 myń DFE-ge deıin jetkizýge qaýqarly. Máselen, ótken 6 aıdyń ishinde 4,2 mlrd teńgeden asa tabys tapqan.
Qazir arnaıy ekonomıkalyq aımaqqa ınvestısııa salýǵa nıet bildirgender kóp. Jobalardyń jalpy quny 500 mlrd teńge bolatyn 28 qatysýshy tirkelip, 18 jer ýchaskesin aldy. Arasynda kásibin ilgeriletip jatqandar da bar. Sonyń biri – Elite baby production kompanııasy.
Jýyrda ǵana iske qosylǵan kásiporyn balalarǵa arnalǵan jórgekter men gıgıenalyq ónimder shyǵara bastady. Al «SSA Feed Mills» JShS jylyna 60 myń tonnaǵa deıin quramajem daıyndaýda. Jobaǵa 4,7 mlrd teńge qarjy jumsaǵan. Budan bólek, arnaıy ekonomıkalyq aımaqta júzege asatyn tyń jobalar da tanystyryldy.
Basshylyqtyń aıtýynsha, bolashaqta halyqaralyq óndiristik qala salý josparda bar. Onda 5 myń adam jumys isteıtin bolady. Sonymen qatar 17 mlrd teńgege atlantıkalyq aqserke ósiretin zaýyt ashý kózdelip otyr. Naqtyraq aıtqanda, aımaqtyń ekonomıkalyq áleýeti zor. Tipti júk jáne jolaýshy tasymalyna arnalǵan áýejaı da qarastyrylǵan. Bul rette, ákimdik jer máselesin sheship berýge yqpal etpek.
Temir jol arqyly júk tasymalyn «Altynkól» stansasy da qamtamasyz etýde. Jyl basynan beri Qytaıdan 1 200-ge jýyq júk jáne jolaýshylar poıyzy kelip, kórshi elge osynsha kólemde poıyz ótken. Táýligine ortasha eseppen munda 900-deı konteıner qabyldanady. Stansadaǵy júkter Qytaıdan Eýropaǵa, Parsy shyǵanaǵy elderine jáne Ortalyq Azııaǵa jóneltilýde.
«Nur joly» avtomobıl ótkizý pýnktinde Prezıdent tapsyrmasyna sáıkes, kólikterdi elektrondy kezekke qoıý júıesi qolǵa alynǵan. Sonyń nátıjesinde kúnine beket arqyly ótetin avtokólik sany 90-ǵa deıin ósti. Eń bastysy, osy ádis arqyly saladaǵy barlyq alypsatarlyq shema tolyǵymen joıyldy.
Jetisý oblysy