Batys Qazaqstan oblysyndaǵy ádemi demalys oryndarynyń biri – Shalqar kóli jaǵasynda respýblıkalyq «Shalqar tolqyny -2022» án baıqaýy ótti. Saıysqa jergilikti ánshilerden bólek, Aqtóbe, Atyraý, Qostanaı, Pavlodar oblystarynan kelgen ónerpazdar qatysty.
Bul baıqaý bıyl úshinshi márte ótip otyr. Oblyqtyq mádenıet basqarmasy jáne Terekti aýdany ákimdigi qoldap ótkizetin tamasha án toıy pandemııa kezinde toqtap qalǵan bolatyn. Araǵa úsh jyl salyp qaıta jandanǵan saıys kórermenniń kóńilinen shyqty.
Elimizdiń ár jerinen jınalǵan 20 ánshi baıtaq dalanyń injý-marjany syndy Shalqar kólinde tamasha demalys kúnderin ótkizdi. Shalqar aýyldyq okrýginiń ortalyǵy Saryómir aýylynyń tarıhymen tanysty. Bul aýyl – belgili jazýshy Hamza Esenjanovtyń týǵan jeri. Jazýshy esimin ıelengen orta mektepte shaǵyn mýzeı uıymdastyrylǵan.
Baıqaýǵa qatysqan ónerpazdar birinshi kezeńde Qazaqstan kompozıtorlarynyń el men jer, Otan taqyrybyndaǵy ánderin shyrqasa, ekinshi kezeńde Aqjaıyq óńiri aqyn-kopozıtorlarynyń shyǵarmalaryn oryndady.
Eki kúnge sozylǵan án dodasynda «Shalqar tolqyny-2022» respýblıkalyq án baıqaýynyń Gran-prı syılyǵyn Atyraý oblysy, Inder aýdanynan kelgen Muratbek Jumashev jeńip aldy. I oryndy – oraldyq Rýstam Hafızov ıelense, qazylar alqasynyń sheshimimen II oryn qostanaılyq Tasqyn Ájibaı men bókeıordalyq Raýan Qajyǵalıevke buıyrdy. Al qaratóbelik Rústem Aqtashev pen Aqtóbe oblysynan kelgen ánshi Nurjan Ábjan III orynǵa ıe boldy. Báıterek aýdanynyń ónerpazy Aqan Jekekov, Oral qalasynyń namysyn qorǵaǵan Balaýsa Ájgereeva jáne Pavlodar qalasynan kelgen «Samǵaý» kvarteti baıqaýdyń dıplomanttary atandy. О́zge qatysýshylar da alǵys hatpen, eskertkish syılyqtarmen marapattaldy.