Memleket basshysy Nursultan Nazarbaev Dúnıejúzilik banktiń ókilderin qabyldady, dep habarlady Prezıdenttiń baspasóz qyzmeti.
Dúnıejúzilik bank tarapynan kezdesýge vıse-prezıdent Lora Tak, Investısııalardy kepildendirý jónindegi kópjaqty agenttiktiń vıse-prezıdenti Keıko Honda jáne Halyqaralyq qarjy korporasııasynyń vıse-prezıdenti Karın Fınkelston qatysty.
Qazaqstan Prezıdenti ekonomıkany damytýǵa jáne uzaqmerzimdi josparlardy júzege asyrýǵa kórsetilgen belsendi qoldaý úshin rızashylyǵyn bildirdi.
– Qazaqstan asa mańyzdy seriktesine aınalǵan Dúnıejúzilik bankpen táýelsizdik jyldarynan beri yntymaqtasyp keledi. Sizderdiń jumystaryńyz bizdiń elimizge paıdaly nátıjeler ákelýde jáne ol Qazaqstanda joǵary baǵa alyp otyr. Banktiń portfelinde mindettemeleriniń jalpy somasy 3,6 mıllıard dollar shamasyndaǵy 10 ınvestısııalyq joba bar. Sonyń 1,5 mıllıardy ıgerildi. Budan arǵy yntymaqtastyqqa shaqyrǵan jańa usynysymyzdy qabyl alǵandaryńyz úshin rızamyn, – dedi Memleket basshysy.
Nursultan Nazarbaev memlekettiń bıyl ekonomıkany damytýǵa, eń aldymen, shaǵyn jáne orta bıznesti, sondaı-aq, ındýstrııalyq baǵdarlamany júzege asyrýǵa 1 trıllıon teńge bóletinin eske saldy.
– Bizdiń talpynystarymyzdy Dúnıejúzilik banktiń qoldaýy asa mańyzdy. Sizdiń bankterińizdiń qyzmeti bizdiń elde jumys istegisi keletin ózge de qarjy ınstıtýttaryn qyzyqtyrady dep úmittenemin. Dúnıejúzilik banktiń tıimdilikti, barlyq úderistiń ashyqtyǵyn arttyrý salasyndaǵy aıtarlyqtaı tájirıbesi baryn eskerip, biz sizderdi tıisti kelisimge qol qoıý arqyly osy bastamany júzege asyrýǵa seriktes retinde shaqyrýǵa sheshim qabyldadyq. Sol úshin biz zańnamamyzǵa ózgeris engizip, ınvestısııalar úshin qajetti barlyq preferensııalar men qolaıly sharttardy usynamyz. Sizderdiń saparlaryńyz bizdiń elimizben qatar banktiń ózi úshin de jemisti bolady dep esepteımin, – dedi Qazaqstan Prezıdenti.
Dúnıejúzilik bank tobynyń atynan vıse-prezıdent Lora Tak Qazaqstanmen uzaqmerzimdi yntymaqtastyqty damytýdy jalǵastyrýdyń mańyzdylyǵyn atap ótti.
– Bizdiń ózara is-qımyldarymyz túrli ekonomıkalyq jobalardyń keń aýqymy aıasynda júrgizilýde. Yntymaqtastyq Qazaqstan Dúnıejúzilik bankke qosylǵan 1992 jyly bastaldy, biz 38 mıllıon dollar kólemindegi alǵashqy kelisimshartymyzǵa qol qoıyp, búginge deıin jalǵasyp kele jatqan baǵyttar boıynsha jumys júrgize bastadyq. Sodan beri Qazaqstan makroekonomıkalyq jáne áleýmettik kórsetkishter jóninen zor ilgerileýge qol jetkizdi. Sondaı-aq, Qazaqstannyń ekonomıkalyq tabystary halyqtyń barlyq toptaryna teń bólinýi úshin úlken jumys atqaryldy. Dúnıejúzilik bank seriktes retinde osy úderisterdiń bárin qanaǵattanýshylyqpen baqylap, barlyq jetistikterge atsalysyp otyrdy, – dedi Dúnıejúzilik banktiń vıse-prezıdenti.
L. Tak «Qazaqstan-2050» Strategııasy Dúnıejúzilik banktiń jumys josparymen sáıkes keletinin atap ótti.
– Biz Qazaqstannyń ındýstrııalyq ekonomıka qurý, jeke sektordy, osy saladaǵy ınnovasııalar men ınvestısııalardy qoldaıtyn arnaýly memlekettik saıasatyn ilgeriletý úshin jedeldetilgen damý baǵdarlamasyn tolyǵymen qoldaımyz. Qazaqstannyń saıası reformalar syrtqy silkinisterge tótep berý qabiletin arttyryp, udaıy ekonomıkalyq ósimdi jalǵastyrýǵa septigin tıgizýi tıis degen ustanymyn da maquldaımyz. Biz Qazaqstan tarapymen jumysty birlese jalǵastyrýǵa zor qulshynysymyzben daıynbyz, – dedi banktiń ókili.
Kezdesý qorytyndysy boıynsha Qazaqstan Respýblıkasy Úkimeti men Halyqaralyq Qaıta qurý jáne damý banki, Halyqaralyq qarjy korporasııasy men Dúnıejúzilik bank tobynyń Investısııalardy kepildendirý jónindegi kópjaqty agenttigi arasynda Qazaqstan Respýblıkasynyń ósimi men ornyqty damýyna atsalysý maqsatyndaǵy yntymaqtastyqty kúsheıtý jónindegi seriktestik týraly negizdemelik kelisimge qol qoıý rásimi ótti.