Lıvııadaǵy ahýal álemdi alańdatyp otyr. Arab memleketteri Lıgasynyń Bas hatshysy Ahmed Ábý Gaıt ońdaǵy qaqtyǵystar aımaq elderi úshin alańdaýshylyq týǵyzatynyn atap ótti.
Arab memleketteri Lıgasynyń resmı Facebook paraqshasynan Ábý Gaıt Lıvııadaǵy sońǵy kúnderi bolǵan qaqtyǵystarǵa qatysty jazbasha málimdeme jasady. Bas hatshy Ábý Gaıt Lıvııanyń Trıpolı jáne Mısrata qalalarynda qarýly qaqtyǵys kezinde adam shyǵyny men jaraqat alǵandardyń bar ekenine toqtalyp, «Lıvııalyqtardyń qaıtadan qolǵa qarý alýy alańdatarlyq jaǵdaı» ekenin aıtty.
Esterińizge sala keteıik, ótken beısenbide Lıvııanyń batys bóliginde ústemdikke ıe «Ár-Rada» jáne «Trıpolı revolıýsıonerler toby» dep atalatyn eki qarýly tarap arasyndaǵy qaqtyǵys bastalǵan. Sonymen qatar eki top arasyna arasha túsý maqsatymen «444 brıgadasy» da atys aımaǵyna óz kúshterin ornalastyrdy. Sońǵy derekter boıynsha qaqtyǵys saldarynan 16 adam qaza taýyp, 52 adam jaraqat alǵan. Qaqtyǵys kezinde Trıpolıdiń Aın Zara aımaǵyna 2020 jyldan beri alǵash ret zymyran qulady. Qarýly qaqtyǵys ýaqytynda astananyń jalǵyz jumys isteıtin áýejaıy Mıtıga birneshe saǵatqa jabylyp, sol kúni keshqurym qaıta ashyldy.
Janjaldan keıin ýaqytsha úkimettiń premer-mınıstri Abdel Hamıd Dbeıbanyń úkimeti ishki ister mınıstri Haled Mazendi qyzmetinen bosatyp, onyń ornyna ýaqytsha aımaqtyq ákimshilik mınıstri Bader Eddın ál-Týmıdi taǵaıyndady.
Arab memleketteri Lıgasynyń bas hatshysy Ábý Gaıt Lıvııa bıligine eldegi qaýipsizdikti qamtamasyz etý úshin qajetti sharalardy júzege asyrý keregin atap ótti. Sondaı-aq Arab Lıgasynyń baspasóz hatshysy Djamal Rýshdı Lıvııanyń saıası qaıratkerlerin eldegi turaqtylyqty qalpyna keltirýdiń mańyzdy bóligi retinde memlekettik mekemelerdi, eń aldymen, áskerı jáne qaýipsizdik mekemelerin bir bılik aıasyna jınaqtaý jaýapkershiligin óz moınyna alýǵa shaqyrdy.
AQSh-tyń Trıpolıdegi elshisi jáne Lıvııadaǵy arnaıy ókili Rıchard B. Norland eldegi ahýalǵa baılanysty jergilikti úkimet múshelerimen telefon arqyly sóılesken. Atap aıtqanda, Ulttyq birlik úkimetiniń premer-mınıstri Abdel Hamıd Dıbeıbe men Tobrýktaǵy О́kilder palatasynyń premer-mınıstri bolyp taǵaıyndalǵan Fethı Bashagany zorlyq-zombylyqtan aýlaq bolýǵa shaqyrǵan. Elde tynyshtyq ornatý isine aralasýǵa daıyn ekenin bildirdi, dep jazady AQSh-tyń Trıpolıdegi elshiliginiń Twitter akkaýnty.
«Búgin keshke Dıbeıbe jáne Bashagamen telefon arqyly sóılesip, eki taraptyń eldegi sońǵy qaıǵyly oqıǵadan keıin tynyshtyqty saqtaýǵa jáne zorlyq-zombylyqtan aýlaq bolýǵa bel býǵanyn estigende qýandym», dep jazdy R.Norland týıtterdegi paraqshasynda. Sonymen qatar Norland óz sózinde «Týyndaǵan máseleni tek saılaý arqyly sheshýge bolady» dep qysqamerzimde saılaý uıymdastyrý úshin naqty shara qabyldaýdyń qajetin atap ótti.
Jalpy, Lıvııada 2011 jylǵy revolıýsııadan keıin, jergilikti narazy top NATO-nyń qoldaýymen Mýammar Kaddafıden bılikti tartyp alǵan edi. Onyń óliminen keıin ishki toptar arasyndaǵy ózara qarýly kúres búginge deıin jalǵasyp keledi. Eki premer-mınıstrdiń bılikke talasý áreketi Lıvııada birneshe aıdan beri shıeleniske sebep bolyp tur. Maýsym aıynda da el astanasynda Sýk Sýlesa aımaǵynda «Navası brıgadasy» men «Turaqtylyqty qoldaý bólimshesi» arasynda qaqtyǵystar bastalyp, dúrbeleń jaǵdaı bolǵan edi.
Shyǵystaǵy áskerı qolbasshy Halıfa Haftardyń Trıpolıdi kúshpen basyp alý áreketine eki jyl toldy. Sarapshylar endi elde jańa úlken qaqtyǵys týyndaýy múmkin dep qaýiptenip otyr.
Mádına AMANBEKQYZY,
«Egemen Qazaqstan»