Muǵaljar aýdany Juryn aýyldyq mádenıet úıi janynan qurylǵan «Sáýlem-aı» analar ansambli 2018 jyldyń naýryz merekesinde tuńǵysh ret halyq aldyna shyqty. Sodan beri birneshe ret kórkemónerpazdar baıqaýyna qatysyp, el ishine tanyla bastady. Ansambldiń on bir múshesi Juryn aýylynda ártúrli salada eńbek etken ana-ájeler.
Máselen, Rabıǵa Qulmurzına, Ajar Dúzelbaeva, Sálıma Ýtýllına, Gúlnar Sarımanova, Kúldanaı Isımbetova –zeınetker bolsa, Gúljan Terekbaeva – temirjol salasynda medbıke, Mánshúk Rahmetova – kásipker, Gúlmıra jáne Gúlsharat Qulmaǵanbetovalar, Janar Aldabergenova – úı sharýasyndaǵy áıelder, Sveta Derbisalına – muǵalim. Qaı-qaısysynyń da arnaıy mýzykalyq bilimi joq bolsa da, qazaqtyń án-kúıin jany súıetin, ónerge jaqyn jandar. Ansambl jetekshisi – Mıra Baıseńgirova. Ol Juryn aýyldyq mádenıet úıiniń kórkemdik jetekshisi bolyp jumys isteıdi. «О́nerge, dombyraǵa jaqyn bolýym atam Baıseńgirden daryǵan dep oılaımyn. Meniń týǵan jerim Baıǵanın aýdany – án men jyrdyń besigi, qazaqtyń salt-dástúrin erekshe saqtaǵan topyraq. «Sáýlem-aı» ájeler ansambli qurylýyna Juryn aýyldyq okrýgi ákimi Ramazan Úrgenishbaevtyń yqpaly zor boldy. Aýyl basshysy ájeler ansamblin qurý arqyly ulttyq qundylyqtarymyzdy dáriptep, umyt bolyp bara jatqan halyq ánderin jańǵyrtý qajet degen oımen jan-jaqty qoldaý kórsetti. Qazir repertýarymyz keńeıdi, úlkenderden estigen halyq ánderin jazyp alyp, ánniń shyǵý tarıhy, oryndaýshylary jóninde de derekter jınastyramyz. Ertede Qaraqamys jármeńkesinde Qyzyl ánshiniń ánderi óte tanymal bolǵan. Keńes ókimetiniń alǵashqy jyldary ashtyqtan ólgen osy ánshiniń muralaryn jınastyrmaqshymyz. О́kinishtisi, el ishinde barlyq ánniń tarıhyn jatqa biletin qarttarymyz ómirden ótip ketti. Soǵan qaramastan halyq áni bolyp aıtylatyn ánniń jurnaqtaryn el ishinen áli de kezdestirýge bolady. Ár mereke saıyn sahnaǵa shyqqanda, jańa bir halyq ánin daıyndaýǵa tyrysamyz», deıdi Maıra Býrabaıqyzy.
«Sáýlem-aı» ansambliniń músheleri qoǵamdyq jumystarǵa da óte belsendi qatysady. Aýyldaǵy turmysy tómen, jalǵyzbasty analarǵa analyq aqyl-keńes aıtyp, bala tárbıesi jóninde tájirıbelerimen bólisedi. Pandemııa kezinde «Biz birgemiz!» aksııasy aıasynda aýyldaǵy jalǵyzbasty, múmkindigi shekteýli jandarǵa betperde tigip, tegin taratty. Muǵaljar aýdanynyń ortalyǵy Qandyaǵash qalasynda ótken «El ishi – óner kenishi» aýdandyq kórkemónerpazdar baıqaýyna qatysyp, «Eń úzdik analar ansambli» atandy. Juryn eldi mekeniniń mádenıetin kóterýge belsendi túrde kirisken analardyń aýyldardy aralaý jospary bar.
Aqtóbe oblysy