Qorǵanys mınıstrliginde vedomstvo basshysy Ádilbek Jaqsybekov Túrik Respýblıkasy Bas shtabynyń bastyǵy, armııa generaly Ilker Bashbýgpen kezdesti. Kezdesý barysynda taraptar áskerı jáne áskerı-tehnıkalyq saladaǵy qarym-qatynastardyń damý qarqynyna qanaǵattanarlyq nıet bildirdi. Qazirgi tańda Qazaqstan men Túrkııa arasyndaǵy qatynas turaqty jáne senimdi áriptestik sıpatqa ıe.
– Túrkııa Qazaqstannyń basym áriptesteriniń biri bolyp tabylady, – dep atap ótti Qazaqstan Qorǵanys mınıstri. – Eki el Qarýly Kúshteri arasyndaǵy áskerı yntymaqtastyqtyń deńgeıin óte joǵary dep aıtýǵa bolady. Áriptestiktiń negizgi baǵyttary elimizdiń áskerı qyzmetshilerin Túrkııanyń áskerı oqý oryndarynda oqytý, qazaqstandyq arnaıy maqsattaǵy bólimshelerdi daıyndaý men olardy jaraqtandyrý, Qazaqstan Respýblıkasy Qarýly Kúshterin reformalaý úderisine járdem kórsetý bolyp tabylady. Qazirgi tańda Qazaqstan Qorǵanys mınıstri men Túrik Bas shtaby bastyǵynyń ótken jylǵy kúzde Ankaradaǵy kezdesýinde qol jetkizilgen negizgi kelisimderi júzege asyrylýda. Búginge deıin túrik áskerı mamandarynyń kómegimen “Komandos”, “Arnaıy maqsat”, “Mergender daıyndaý”, “Ishki qaýipsizdik” baǵdarlamalary boıynsha 500-den astam qazaqstandyq áskerı qyzmetshi daıyndyqtan ótti. 2007 jyldan beri Aeroutqyr áskerleriniń arnaıy maqsattaǵy bólimsheleriniń 400 jaýyngeri “Komandos” kýrsy boıynsha tájirıbeden ótti. Qazaqstan Qorǵanys mınıstri Túrkııa oqý oryndarynda Qazaqstan áskerı qyzmetshilerin oqytýdaǵy múmkindikke rızashylyǵyn bildirdi. Kezdesýden soń taraptar búgingi kezdesý eki memleket qorǵanys vedomstvolarynyń arasyndaǵy ekijaqty yntymaqtastyqqa jańasha serpin beretinin atap ótti. Sapar sheńberinde Túrik áskerı delegasııasy Astanadaǵy Atatúrik eskertkishine gúl qoıyp, taǵzym etti, dep habarlady elimiz Qorǵanys mınıstrliginiń baspasóz qyzmeti.