Jetisý oblysynyń ákimi Beıbit Isabaev úsh halyqaralyq qarjy ınstıtýtynyń atynan kelgen delegasııamen kezdesti. О́ńir basshysy Eýropalyq qaıta qurý jáne damý banki, Dúnıejúzilik bank jáne Azııa damý banki ókilderimen birge ekonomıkanyń túrli salalaryndaǵy yntymaqtastyq múmkindikterin jáne aýyl sharýashylyǵy ónimderin qaıta óńdeý, áleýmettik, kóliktik jáne áleýmettik salany jaqsartý jobalaryn talqylady.
Kezdesýge Eýropalyq odaqtyń Qazaqstan Respýblıkasyndaǵy Elshisi Kestýtıs Iаnkaýskas ta qatysty. Jıynda oblys basshysy óńirdiń áleýmettik-ekonomıkalyq damýynyń negizgi baǵyttaryn qysqasha baıandap, agroónerkásip kesheniniń múmkindikterine keńinen toqtaldy.
«Bizdiń basty mindetimizdiń biri – óńirge ınvestısııa tartý. Ásirese aýyl sharýashylyǵy ónimderin óńdeýge tartý. Qazir qantpen qamtamasyz etýde problemalar bar. Elimizde 4 qant zaýyty bolsa, onyń 2-eýi bizdiń oblysta. Ekeýi de jaqsy jańartylǵan. Kóksý qant zaýyty qant qyzylshasyn da, shıki qamysty da óńdeıdi. Al Aqsý qant zaýytynda jóndeý jumystary júrip jatyr. Alakól aýdanynda ornalasqan úshinshi qant zaýytyn qalpyna keltirýge qyzyǵýshylyq tanytsańyzdar, qýanar edik. Jer jánnaty Jetisý ólkesi tumsa tabıǵatymen, saf aýasymen erekshe. Sondyqtan munda tórt maýsymda týrızmdi damytýǵa jaqsy múmkindikter bar», dedi B.Isabaev.
Jıyn barysynda Azııa damý bankiniń Qazaqstandaǵy dırektory Narıman Manapbekov ózi ókildik etetin qarjy ınstıtýty áleýmettik ınfraqurylymdy, atap aıtqanda, mektep, aýrýhana, sý elektr stansalaryn jáne basqa da jańartylatyn energııa nysandaryn salý jobalaryn qoldaýǵa múddeli ekenin aıtty. Aýyl sharýashylyǵy ónimderin qaıta óńdeý kásiporyndaryn odan ári damytý maqsatynda ınvestısııa tartý múmkindikterine de toqtaldy.
Eýropalyq qaıta qurý jáne damý bankiniń Qazaqstandaǵy ókildiginiń dırektory Hýseın Ozhan turǵyn úı-kommýnaldyq sharýashylyǵyndaǵy jobalardy nesıelendirý baǵdarlamasyna, atap aıtqanda, bankterdi jańǵyrtýǵa erekshe nazar aýdardy. Ol sý sharýashylyǵy nysandary, kóshelerdi jaryqtandyrý júıeleri, jylý jáne sýmen jabdyqtaý, qatty turmystyq qaldyqtardy óńdeý, sıfrlandyrý salasynda, onyń ishinde sıfrlyq baýyrlas qalalardy qurýǵa nıetti ekenin bildirdi. Qarjy ınstıtýtynyń ókilderi aýyl sharýashylyǵy ónimderin qaıta óńdeý men jańartylatyn energııa kózderin damytý boıynsha jeke jobalardy, sondaı-aq kólik-logıstıkalyq ınfraqurylymdy, ásirese temir joldy qoldaýǵa múddeli ekenin jetkizdi.
Dúnıejúzilik banktiń Qazaqstandaǵy turaqty ókili Jan-Fransýa Marton «jasyl» óndiristi, sıfrlyq, kóliktik baılanystardy damytý múmkindigi jaıly sóz qozǵady.
Jıyndy qorytyndylaǵan oblys ákimi Beıbit Isabaev: «Bizdiń úlken josparymyz bar. Sondyqtan arnaıy jobalar daıyndap qoıdyq. Olarmen tanysqannan keıin sizderdiń usynystaryńyzdy eskere otyryp, barlyq máseleni egjeı-tegjeı talqylaı alamyz. Bul tıimdi bolady dep oılaımyn», dedi.
Aıta keteıik, iske asyrýǵa daıyn jobalardyń qatarynda et-sút sektory, jemis-jıdek saqtaý qoımalary men jemis-jıdek konservi zaýyttarynyń qurylysy jáne jalpy aýylsharýashylyq ónimderin qaıta óńdeý, Alakól jaǵalaýynda sanatorııalyq-saýyqtyrý mekemelerin damytý, Tekeli qalasyndaǵy týrızm máselesi bar.
Kezdesý sońynda barlyq tarap jumysty odan ári jandandyrý úshin usynylǵan jobalardy zerdelep, jaqyn arada mazmundy talqylaýǵa oralamyz dep kelisti. Oblystyq kásipkerlik jáne ındýstrıaldy-ınnovasııalyq damý basqarmasynyń basshysy Dıas Serikovtiń aıtýynsha, búginde Jetisýdaǵy ınvestısııalyq jobalar pýly 278 jobadan turady.
Jetisý oblysy