Alqarakók aspannyń kúńgirt kúmbezine, tal tústegi kún kózimen shaǵylysqan kógildir saǵymǵa, kók bultqa shomylǵan aǵashtardyń ushar basynda qadalyp otyryp jer men kóktiń táńir bergen ǵajaıyp boıaýyn kókeıine qondyrǵan. О́mirdiń oǵan bergen osynaý enshisine esh baǵa jetpeıtin sekildi. Sheksizdik… múmkin dáýirlerdiń bir núktede toǵysýy.
Sýretkerdiń ishki álemine úńilseńiz, siz de saǵymǵa oranasyz. Kóz aldyńyzda jyldar júıtkı jóneledi. Siz ýaqytqa ilese almaısyz, máńgilik qansha qýalasańyz da jetkizbeıtin eles... Sheberhanadaǵy myń boıaýdyń árqaısysy ózge ǵalamshardyń túr-túsin, keskin-kelbetin bederlep turǵandaı. Avtor – jalǵyz, keıipker kóp, ıakı ǵasyrdyń erkine baǵyndyrǵan qylqalam sheberine daralyq ınstıng berilgen.
Bul – Tileýjan Batanov. Ǵajaıyp sýretshi hám skýlptor. Onyń abstraksııaǵa toly kartınalary kez kelgen ıntererge, tipti beımálim tarıhı oqıǵalarǵa syıyp ketedi. Onyń abstraksıonızmge áýestigi sonsha, qoltańbasynda art-deko men mınımalızmniń estetıkalyq bastaýy tur. Eger siz úıińizdi bezendirý úshin keskindeme satyp alǵyńyz kelse, abstraksııa kez kelgen zamanaýı stıl úshin eń jaqsy tańdaý bolyp qala bermek. Bul realızmnen qashýdyń amaly emes, qaıta ony bıikke kóterý. Muny sýretshi jaqsy túısingen.
Máselen, sýretkerdiń biz usynǵan kartınasyna nazar salyńyzshy. Qyran qus, qysh ydystar, atty adam, sham, domalanǵan dúnıe bári-bári alystan munartady, olar ár dáýirdiń belgileri, biraq kenepke kenetten qonbaǵan. Avtordyń oılaý órisi aspandy tutastaı bir jaryqtyń sheńberine baılap, ótken men búginginiń arasyna shekara qoımaıdy. Shyǵarmanyń ereksheligi de osynda.
Iá, bir qaraǵanda týyndydan realıstik máner kóre almaımyz. Kenepke quddy fýtýrızm men kýbızm rýhy qonǵan sekildi. Intereri óte baı, dereksiz de emes. Abstraksııany óziniń sándiligimen jáne dekorynyń kóptigimen tarıhı stılge sáıkes keltirilgen. Munda sheksizdikten bólek, mezgilderdiń úılesimi, eskilikke kózqaras, bolashaqqa degen baılam bar. Sýretkerdiń kartınaǵa ataý qoıa almaǵany sodan da bolar. Bútin dúnıeni bir sózben sıpattaý múmkin be?!