О́tken jyly el Táýelsizdiginiń 30 jyldyǵyna oraı «Úzdik 30 aýyl» jobasy qolǵa alynǵan edi. Elimizdegi úzdik otyzdyń qataryna Atyraý oblysynan eki aýyl enip otyr.
Sonyń biri – Mahambet aýdanyndaǵy Mahambet aýyly. Munda 13 myńnan astam turǵyn, 19-ǵa jýyq ózge etnostyń ókili turady. Aýylda 3 orta mektep, 1 saz mektebi, 2 sport mektebi, 5 balabaqsha, 1 emhana men aýrýhana, ortalyq jáne balalar kitaphanasy, jańadan salynǵan murajaı, sáýletti mádenıet úıi jáne meshit bar. Aýylda 2007 jyldan bastap ıpotekalyq ádispen eki qabatty 80 úı shaǵyn aýdan retinde boı kóterdi. Barlyq úı men mekeme túgelge jýyq tabıǵı gaz jelisine qosylǵan. Aýylda 3 saýda úıi, 3 janar-jaǵarmaı quıý stansasy tutynýshyǵa qyzmet kórsetedi. Egin jáne mal sharýashylyǵymen aınalysatyn 12 sharýa qojalyǵy jumys isteıdi.
Ekinshisi – Jylyoı aýdanyndaǵy Shoqpartoǵaı aýyly. Bul aýyldy 3 100-den astam turǵyn meken etedi. Aýylda 58 sharýa qojalyǵy, 1 balabaqsha, 1 mektep, 1 emhana men sport mektebi jumys istep tur.
Joba avtory Murathan Shoqannyń málimetinshe, «Úzdik 30 aýyl» anyqtamalyq kitabyna qos aýyldyń tarıhy, tynys-tirshiligi, bilim, sport, densaýlyq, mádenıet salasy men áleýmettik-ekonomıkalyq damý yrǵaǵy, shaǵyn jáne orta kásipkerliktiń órkendeýi týraly málimetter qamtylyp otyr. Sondaı-aq aýyldan shyqqan tanymal tulǵalar jóninde maǵlumattar engizilgen.
– Aýyl – qazaqtyń túpqazyǵy, altyn besigi. Sol sebepten, atalǵan joba aıasynda úzdik aýyldardy anyqtap, ózgelerge, ásirese óskeleń urpaqqa úlgi etýdi kózdedik. Týǵan aýylyn kórkeıtýge úles qosyp júrgen azamattardy dáripteý, sol arqyly kásipkerler men jastardyń nazaryn atamekenge bursaq degen maqsatymyz boldy, – deıdi joba avtory Murathan Shoqan.
Atyraý oblysy