«Ashyq saǵat alańy» jobasy aıasynda jol boıyndaǵy qyzmet kórsetý nysandaryn damytý máselesi talqyǵa salyndy. Is-sharaǵa Indýstrııa jáne ınfraqurylymdyq damý mınıstrligi Avtomobıl joldary komıtetiniń tóraǵasy Tólegen Abdýllın, «QazAvtoJol» UK» AQ Basqarma tóraǵasynyń orynbasary Erjan Ýtıýbaev, Ulttyq kásipkerler palatasy, ákimdikterdiń jáne jeke bıznes ókilderi qatysty.
Jıynda Kooperatıvter jáne ekonomıkalyq qoǵamdastyqtardyń basqa da nysandary ulttyq qaýymdastyǵynyń prezıdenti Qazybek Shaıhtyń usynystaryna erekshe nazar aýdaryldy. Onyń aıtýynsha, kooperasııa baǵdarlamalary arqyly jergilikti turǵyndar men kópbalaly analardy qoldaý salanyń damýyna oń áserin tıgizedi, sondaı-aq bıýdjetke júktemeni azaıtady.
Sondaı-aq memleketten preferensııalar alý sııaqty ózekti másele kóterildi. Búginde jol boıyndaǵy qyzmet kórsetý nysandary úshin JQS salý kezindegi shyǵyndardyń 10%-yn óteý jáne sanıtarlyq-gıgıenalyq toraptardy ustaýǵa aı saıyn 83 300 teńge mólsherinde sýbsıdııalar sııaqty qoldaý sharalary bar.
О́tem alýǵa ótinimderdi kásipkerlik jáne týrızm basqarmasyna 1 naýryzǵa deıin, al sanıtarlyq-gıgıenalyq toraptardy sýbsıdııalaýǵa jyldyń sońyna deıin berý qajettigi aıtyldy.
Sonymen qatar UKP Týrızm departamentiniń sarapshysy Ásel Kóbentaeva atap ótkendeı, búginde qoldaý sharalary boıynsha erejeler pysyqtalýda. Qazirgi ýaqytta Ádilet mınıstrliginde bekitýge ótinimderdi qabyldaý merzimin jylyna eki retke uzartý boıynsha bastama qaralyp jatyr.
«Biz mańyzdy másele – jol boıyndaǵy qyzmet kórsetý obektilerin damytýdy, onyń ishinde avtojanarmaı quıý stansalarynyń, jyly dárethanalardyń qurylysy máselelerin talqyladyq. Búgingi tańda bul salada birshama qıyndyq bar. Sondyqtan talqylanǵan máselelerdi esepke alyp, olardy qysqa merzimde sheshý úshin bar kúsh-jigerimizdi salamyz», dep sózin túıindedi komıtet tóraǵasy.