Batys Qazaqstan oblysynda koronavırýs ınfeksııasyn juqtyrǵandar sany kúrt kóbeıdi. Bul jóninde oblystyq densaýlyq saqtaý basqarmasynyń basshysy Arman Qalıbekov habarlady.
Aqjaıyq óńirinde epıdemııalyq jaǵdaı alańdatarlyq. О́ńirde koronavırýspen syrqattanýshylyq deńgeıi ótken aılarmen salystyrǵanda kúrt ósip ketken.
– Shilde aıynyń basynan beri oblysta koronavırýs ınfeksııasyn juqtyrýdyń 207 jaǵdaıy tirkeldi. Onyń 164-i – sımptomdy, 43-i – sımptomsyz. О́tken aımen salystyrǵanda aýrýshańdyq deńgeıi 99,1%-ǵa ósti. Maýsym aıynda mundaı naýqas nebári tórteý bolatyn, – deıdi Arman Talǵatuly.
Jalpy, óńirde jyl basynan beri koronavırýs dıagnozymen 9 797 adam dárigerge qaralǵan. Al pandemııa bastalǵaly beri osy dertke shaldyqqandardyń sany 50 myńǵa (49 794) jýyqtapty.
Bas dárigerdiń aıtýynsha, koronavırýs boıynsha ınfeksııalyq stasıonarǵa túskender sany da kúnnen-kúnge artyp keledi. Máselen, shilde aıynyń alǵashqy jartysynda ınfeksııalyq stasıonarlarda jalǵyz naýqas bolsa, arada bir apta ótkende naýqas sany 33-ke jetip, ósim 97 paıyzdy quraǵan.
Árıne, dárigerler tótenshe jaǵdaıdyń aldyn alýǵa tyrysyp jatyr. О́tken jyldardyń tájirıbesi tekke ketpedi. Qazirdiń ózinde vırýs juqtyrǵan balalarǵa, júkti áıelderge medısınalyq kómek kórsetý maqsatynda oblystyq perınataldyq ortalyqtan, qalalyq kópbeıindi aýrýhananyń bosandyrý bóliminen jáne oblystyq kópbeıindi balalar aýrýhanasynan ınfeksııalyq 32 tósektik oryn ázirlengen.
Jalpy, oblys boıynsha qazirgi tańda 222 ınfeksııalyq tósek daıyn bolsa, ol jerde 33 naýqas em alýda. Ázirge derti asqynyp, reanımasııa bólimine túsken naýqas joq. 165 adam ambýlatorlyq deńgeıde em alýda.
– Koronavırýs ınfeksııasyna qarsy kúrestiń eń tıimdi ári senimdi joly – vaksınalaý. Dál qazir Batys Qazaqstan oblysynda PFIZER kompanııasynyń Comirnaty vaksınasynyń 1 500-ge jýyq dozasy, qytaılyq Vero CellComirnaty vaksınasynyń 50 myńǵa jýyq jáne otandyq QazVac vaksınasynyń 12 myńdaı dozasy bar. О́zińiz bilesiz, PFIZER kompanııasynyń Comirnaty jáne Sinopharm kompanııasynyń Vero Cell vaksınalaryn Dúnıejúzilik densaýlyq saqtaý uıymy maquldaǵan, – deıdi A.Qalıbekov.
Statıstıkalyq derekterge súıensek, oblysta koronavırýsqa qarsy vaksınanyń I komponentin – 278 186 adam, II komponentin – 269 729 adam alǵan eken. Bul belgilengen jospardyń 65-67 paıyzy ǵana.
Búginde oblys boıynsha Pfizer kompanııasynyń «Komırnatı» vaksınasyn 20 215 adam aldy. Onyń ishinde 456-sy júkti áıelder, 5291-i bala emizetin áıelder, 6511-i jasóspirimder, 16-sy múgedektik toby bar jáne 7 941 basqa sanattaǵy adamdar. Oblys boıynsha barlyǵy 102 792 adam revaksınalaýdan (51,3%), 6 443 adam qaıta revaksınalaýdan (42,3 %) ótken.
Jaqynda respýblıkalyq vedomstvoaralyq komıssııa eldegi koronavırýs ınfeksııasy boıynsha epıdemııalyq ahýaldy talqylaǵan edi. Osy jıynda kóterilgen bir másele revaksınalaý bolatyn. Qazaqstan boıynsha Batys Qazaqstan oblysy 15-orynda tur. «Bul aıtarlyqtaı tómen kórsetkish», deıdi oblystyq densaýlyq saqtaý basqarmasynyń basshysy.
Densaýlyq saqtaý mınıstrliginiń aqparatyna qarasaq, aýyrǵandardyń 89%-y – vaksına almaǵandar ne vaksına alǵanynan keıin 6 aıdan astam ýaqyt ótken adamdar eken. Halyq arasynda ujymdyq ımmýnıtet qalyptasýy úshin de revaksınalaý deńgeıi 65 paıyzdan kem bolmaýy qajet. Sondyqtan mamandar buryn ekpe alǵan jandardy qaıtadan vaksına alýǵa shaqyryp jatyr.
Qalyptasqan jaǵdaıǵa baılanysty búginde oblystyń barlyq emhanasynda maska rejimi, fıltr-kabıneti men mobıldi brıgadalar jumysy qalpyna keltirildi. COVID-19 taralýyn boldyrmaý jáne epıdemııalyq ahýaldy odan ári nasharlatpaý maqsatynda epıdemııaǵa qarsy sharalar engizilip jatyr. Ásirese kópshilik oryndarda áleýmettik araqashyqtyqty saqtap, múmkindiginshe adam kóp jınalatyn jerlerge barmaý týraly keńes berilýde. Áýe jáne temir jol kólikterinde, halyqaralyq avtobýstarda jáne jabyq ǵımarattarda maska taǵý usynylǵan.
Batys Qazaqstan oblysy