Moldovada ótip jatqan Eýrolıga oıyndarynda Qazaqstan quramasy qatarynan úshinshi oıynda jeńiske jetti, dep habarlaıdy Egemen.kz.
«S» tobynyń sheshýshi oıynynda Qazaqstan quramasy Grekııamen kezdesti. Eki qurama da osy oıynǵa alty upaımen kelip, birinshi oryn úshin talasty.
Grekııa quramasy birinshi taımdy óz paıdasyna aıaqtady. Esep – 1:0. Gol avtory – Skoýrtas.
Ekinshi taımda namysqa tyrysqan Bolat Álenov komandasy keremet kombınasııa uıymdastyryp, sońyn golǵa ulastyrdy. Tarazy basyn teńestirgen Roman Bogdanov.
Tartysty oıynnyń úshinshi bóliginde eki jaq aıyp dobynan gol almasty. Eń aldymen qarsylastyń oıynshysy Papastatopýlýs dál soqqymen Grekııa quramasyn taǵy da alǵa shyǵardy. Qazaqstan quramasynyń oıynshysy Stanıslav Makagon da óz múmkindigin múlt jibermeı, jyldam esepti teńestirdi.
Oıynnyń jeńimpazy penaltı serııasynda anyqtaldy. Bizdiń quramadan Asqar Ájikenov, Baıanbek Mýralınov, Tımýr Ershın jáne Vıtalıı Tıýlpa múlt ketpedi. Al qarsylastyń sońǵy soqqysyn qaıtarǵan qaqpashy Vsevolod Gavrılov Qazaqstan quramasyna jeńis syılady.
Toptyq kezeńniń barlyq oıynynda jeńiske jetken Qazaqstan quramasy birinshi orynǵa ıe bolyp, Promofınaldyń jartylaı fınalyna shyqty. Sonymen qatar bizdiń jigitter «V» dıvızıonynyń úzdik tórttigine enip, 2023 jyly ótetin Eýrolıganyń «A» dıvızıonyna joldama aldy.
Jartylaı fınaldyń oıyndary erteń, 30 shildege josparlanǵan. Qazaqstan quramasynyń qarsylasy sálden soń anyqtalady.
Grekııa – Qazaqstan – 2:2 (1:0, 0:1, 1:1. penaltı serııasy 3:4)