Shahmattan Úndistannyń Chennaı qalasynda ótip jatqan olımpıadany Qazaqstannyń qyzdar quramasy sátti bastady. Jerlesterimiz alǵashqy eki oıynda Gvatemala men Belgııa quramalarynan basym tústi.
Qazaqstannyń shahmatshy qyzdar quramasy olımpıadanyń alǵashqy aınalymynda Gvatemala sportshylarymen oınap, 4-0 esebimen jeńiske jetti. Ekinshi raýndta jerlesterimiz Belgııa quramasymen sheberlik baıqasyp, bul joly da qarsylastaryn tize búktirdi – 3-1. Bul kezdesýde Bıbisara Asaýbaeva men Nazerke Nurǵalı óz oıyndarynda jeńiske jetse, Jansaıa Ábdimálik pen Ksenııa Balabaeva teń tústi.
Al alǵashqy aınalymda qytaılyq Taıpeıden 3:1 esebimen basym túsken Qazaqstan erler quramasy ekinshi matchta Tájikstan shahmatshylarynan jeńilip qaldy – 1,5-2,5. Bul matchta Qazybek Nógerbek qarsylasynan basym tússe, Arystanbek Orazaev teń oınady. О́kinishke qaraı, Álisher Súleımenov pen Murtas Qajyǵalıev qarsylastaryna jol berdi.