4-7 tamyz aralyǵynda Jaqsylyq Úshkempirov atyndaǵy elordalyq jekpe-jek saraıynda dzıýdodan erler men áıelder arasynda Azııa chempıonaty ótedi. Qurlyqtyq birinshilikte tórt kún boıy tatamı sheberleri jeke jáne aralas-komandalyq jarystarda myqtylardy anyqtaıdy, dep habarlaıdy Egemen.kz Nur-Sultan ákimdiginiń resmı saıtyna silteme jasap.
Týrnırge Azııanyń 19 elinen 200-ge jýyq dzıýdoshy qatysady. Dzıýdodan Qazaqstan quramasynyń bas bapkeri Nurbol Súleımenov osy maýsymnyń qorytyndysy boıynsha quram qurdy. Qurlyqtyq birinshilikke qatysýshylar qataryna álem chempıonatynyń júldegerleri Ǵusman Qyrǵyzbaev (66 kg) jáne Erlan Serikjanov (66 kg), Azııa chempıonatynyń úsh dúrkin júldegeri Islam Bozbaev (-100 kg), Gran-prı jeńimpazy Maǵjan Shamshadın (60 kg) jáne Grand Slam álemdik kezeńiniń júldegeri Baýyrjan Narbaev (60 kg) kirdi.
Sondaı-aq dzıýdodan erler quramasynyń tolyq quramy kelesideı: Maǵjan Shamshadın (60 kg), Baýyrjan Narbaev (60 kg), Ǵusman Qyrǵyzbaev (66 kg), Erlan Serikjanov (73 kg), Danııar Shamshaev (73 kg), Dıdar Hamza (90 kg), Nurlyhan Sharhan (-100 kg), Islam Bozbaev (-100 kg), Ádil Orazbaev (+100 kg).
Erlan Alpysbaevtyń jetekshiligimen Qazaqstan áıelder quramasynan 9 sportshy qatysady: Abıba Abýjakınova (48 kg), Ǵalııa Tynbaeva (48 kg), Gaýhar Irmaǵambetova (52 kg), Sevara Nıshanbaeva (57 kg), Móldir Narynova (63 kg), Anastasııa Maıakova (70 kg), Arýna Jangeldına (-78 kg), Kamıla Berlıkash (+78 kg), Nazgúl Maratova (+78 kg).
«Azııa chempıonatyna qatysýshylar arasynda olımpıada chempıondary men álem birinshilikteriniń júldegerleri de baq synaıdy.
Aıta ketý kerek, IJF erejeleri boıynsha Azııa chempıonatynyń medal ıegerlerine olımpıadalyq reıtıngte upaılar qosylady. Atap aıtqanda, jeńimpaz 700 upaı, kúmis júldeger – 490 jáne qola júlde – 350 upaı alady.
Dzıýdodan Azııa chempıonaty «Qazsport» otandyq sport arnasynda kórsetiledi», delingen habarlamada.