Osydan biraz ýaqyt buryn «Atameken» UKP Tóralqasy janyndaǵy Agroónerkásip kesheni komıtetiniń tóraǵasy Jıgýlı Daırabaev Agrobank qurý arqyly fermerlerdiń qolaıly nesıe alýyna jaǵdaı jasaý jóninde usynys aıtqan edi. Biraq bul usynys kezinde Úkimet tarapynan da, qarjy sektoryn baqylaýshy organdar tarapynan da qoldaý tappaǵan bolatyn. Jaqynda J.Daırabaev taǵy bir buıymtaıdyń shetin shyǵaryp, «О́KM operatory» qarjysy esebinen 50 mlrd teńge qarjylandyrý kóleminde aýyl sharýashylyǵy tehnıkalaryn jeńildetilgen lızıngpen berý baǵdarlamasyn iske qosý jóninde Memleket basshysyna tikeleı ótinish bildirdi.
«Qazaqstan fermerleri atynan sizdiń 2022 jyldyń 14 shildesinde Úkimettiń keńeıtilgen otyrysynda aıtqan otandyq aýyl sharýashylyq tehnıkalaryna jeńildetilgen nesıeleý mehanızmin engizý týraly tapsyrmańyzdy tolyǵymen qoldaımyz» degen ol elimizde astyq jınaý naýqany tamyz aıynyń birinshi jartysynda bastalatynyn, biraq ótken jyldary aýyl sharýashylyǵy taýaryn óndirýshiler arasynda jaqsy nátıje bergen qazirgi aýyl sharýashylyǵy tehnıkasyn lızıngke berý baǵdarlamalaryna qarajattyń joqtyǵynan búginde aýyl sharýashylyǵy tehnıkasyn jappaı jańartý múmkin emestigin eske saldy.
Aýyl sharýashylyǵy mınıstrliginiń deregi boıynsha, otandyq aýyl sharýashylyq tehnıkalarynyń parkinde 147,7 myń traktor, 38,1 myń kombaın bar. Bul rette eskirgen tehnıka úlesi 80 paıyzǵa jetken.
«Máseleniń mańyzdylyǵyn jáne astyq jınaý naýqany jaqyndap kele jatqanyna baılanysty mańyzdy merzimderdi eskere otyryp, sizden kómek suraımyz. Atap aıtqanda, Indýstrııa jáne ınfraqurylymdyq damý mınıstrligine, Ekologııa, geologııa jáne tabıǵı resýrstar mınıstrligine, Aýyl sharýashylyǵy mınıstrligi men «Báıterek» UBH» AQ 3 paıyzǵa deıingi syıaqy mólsherlemesimen bastapqy jarnasyz «О́KM operatory» esebinen qarjylandyrý kólemi 50 mlrd teńge bolatyn aýyl sharýashylyǵy tehnıkasyn jeńildetilgen lızıngke berý baǵdarlamasyn iske qosý týraly tapsyrma berýińizdi suraımyz», deıdi J.Daırabaev Prezıdentke aıtqan usynysynda.
Onyń sózine qaraǵanda, atalǵan baǵdarlamanyń iske qosylýy parktegi 1 myń birlik traktor men kombaındy jańartyp alýǵa, sóıtip astyq jınaý naýqanyna abyroımen úlgerýge múmkindik beredi.
Osyǵan deıin senator Muhtar Jumaǵazıev aýylsharýashylyq tehnıkalaryn sýbsıdııalaýdy qaıta qaraý keregin jetkizgen edi. Depýtattyń aıtýynsha, tehnıkanyń eskiligine baılanysty astyq jınaý naýqany durys atqarylmaıdy, bul óz kezeginde óndiristiń qysqarýyna jáne basqa da shyǵyndarǵa jol ashyp beredi. Qazir kásiporyndardy qoldaý úshin otandyq jáne sheteldik tehnıkalar sýbsıdııalanady. Otandyq óndiristen shyǵatyn «Esil» jáne «Vektor» kombaındary 40-50 mln teńge tursa, ımporttyq Claas nemese John Deere kombaındary 120-150 mln teńge kóleminde.
«Soǵan saı, qazaqstandyq kombaındarǵa beriletin sýbsıdııa 10-12,5 mln teńgeni qurasa, shetelden satyp alynǵan tehnıkalar úshin 30-30,5 mln teńge beriledi. Endi osy qısynǵa salsaq, memleket bir ımporttyq kombaınnyń ornyna úsh birdeı otandyq kombaındy sýbsıdııalaı alady. Sol sebepti otandyq óndiriske qoldaý kórsetýimiz kerek. Sýbsıdııa máselesi qaıta qaraýdy talap etedi», degen bolatyn M.Jumaǵazıev.
Fermerler men sarapshylardyń aıtýynsha, sońǵy birer jyl kóleminde aýylsharýashylyq tehnıkalary qatty qymbattap ketken. Shamamen 30 paıyzǵa ósken. Endi olardyń tapshylyǵy da baıqalýda. Bizdiń el agrotehnıkalardy negizinen TMD elderinen satyp alady.
Aýylsharýashylyq tehnıkalaryn jetkizýshi kompanııanyń kommersııalyq dırektory Oırat Muhamedjanovtyń aıtýynsha, birinshiden metaldyń qymbattaýy, ekinshiden valıýtanyń turaqsyzdyǵy tehnıkalar baǵasyn ósirip jatyr.
«Qazir men balama jol retinde Qytaı, Túrkııa elderin qarastyramyn. Túrkııalyq óndirýshi zaýyttarmen kelissóz júrgizip jatyrmyz» deıdi ol.
Al Avtomobıl qurastyrý, arnaıy jáne aýylsharýashylyq mashına jasaý basqarmasynyń basshysy Rýslan Hısamýtdınovtyń aıtýynsha, 2021 jyly 5 714 traktor, 1 400 kombaın satyp alynǵan. Sonyń 11 paıyzy ǵana – ımporttyq tehnıka.