Osydan shamaly ýaqyt buryn Zaısan qalasynda eleýli oqıǵa boldy. Jazýshy, jýrnalıst Asqar Sábıtovtiń (marqum) uıymdastyrýymen jaryq kórgen «Zaısannyń jaısań balýandary» atty kitaptyń tusaýkeserine Almaty men elordadan, elimizdiń basqa eldi mekenderinen kezinde boz kilemde jasyn oınatqan býra san, bota tirsek balýandar jınalyp, jerlesterimen júzdesti. Olar úsh kún boıy kúrespen shuǵyldanyp júrgen balalardyń ónerin tamashalady, ózderi de boz kilemde óner kórsetti.
Jas urpaqqa úlgi-ónege, tálimi mol kezdesý týraly aıta ketken oryndy.
– «Zaısannyń jaısań balýandary» respýblıkalyq uıymyn qurýdaǵy maqsat», – dedi osy is-sharany uıymdastyrýshylardyń biri, uıym tóraǵasy Erkin Ýanbaev, – Zaısan aýdanynyń jas balýandarynyń sportta, ómirde joǵary jetistikterge jetýine kómektesý, balýandyq ónerdi óskeleń urpaqqa, halyqqa nasıhattaý, bolashaǵy bar aýdan jastaryn qoldaıtyn qor uıymdastyrý, aýdandaǵy orta mektepte oqıtyn balalardy kúres túrlerine tartý, taǵysyn taǵylar.
Aýdan halqy shalǵaıdan at arytyp kelgen ataqty jerlesterin saǵynyp qalypty. Ataqty balýan, eńbek sińirgen jattyqtyrýshy, О́skemen qalasy men Zaısan aýdanynyń qurmetti azamaty, Olımpıada júldegeri men álem chempıondaryn baptaǵan bilikti bapker Janádil Ataev, esimderi elge belgili Jeńis Smaǵulov, Erkin Eleýbaev, Marat Saýhatov, Qadylbek Smaǵulov, Kenjebek Rahımov, taǵy basqalar óz áserlerimen bólisti. Olar qalada birneshe kezdesý ótkizdi. Balǵyn balýandardyń jarysyn tamashalady. Respýblıkalyq uıym qorynda Zaısan aýdanynda týyp-ósip elimizdiń ózge óńirlerinde tıimdi jumys istep júrgen kásipkerler men balýandardyń jınaǵan qarjysyna dzıýdo kúresinen respýblıkalyq, erkin kúresten oblystyq týrnır ótkizildi. Zaısan sport mektebine jarystardy joǵary deńgeıde túsirýge qajet 2 beınekamera men televızor syıǵa tartyldy. О́skemende oqyp júrip, jarys kezinde jaraqat alǵan zaısandyq Erkin Ábdiramanovqa qomaqty qarjylaı kómek kórsetildi. О́mirden ótken balýandar eske alynyp, 300 adamǵa as berildi. Sondaı-aq respýblıkalyq uıymnyń uıymdastyrýymen qazaq kúresinen jaýyryny jerge tımegen Tólegen Erjanulynyń týǵanyna 100 jyl tolýyna oraı oblystyq eske alý týrnıri ótkizildi. Úsh kúnge sozylǵan sporttyq, áleýmettik-mádenı is-sharalardyń basy-qasynda bolǵan, uıymdastyrylýyna qolaıly jaǵdaı jasaǵan Zaısan aýdanynyń burynǵy sport bólimin basqarǵan tájirıbeli basshy Zaınolda Rahımbaevtyń, oblysqa belgili kásipker balýan, qorǵa 1 mıllıon teńgeden astam qarjy quıǵan Qýat Abjanov pen jarty mıllıon teńge quıǵan Aızat Sıyrbaevtyń eńbekterin atap ótken oryndy. Jeńimpazdardy, osy jumystarǵa belsene atsalysqandardy aýdan ákimi Serik Zaınýldın, «Zaısannyń jaısań balýandary» Respýblıkalyq uıymynyń tóraǵasy Erkin Ýanbaev quttyqtap, osy is-sharaǵa arnaıy jasatylǵan estelik medal tapsyrdy.
Taǵylymy mol bul kitapta aýdan sportynyń órkendeýine erekshe úles qosqan azamattar men azamatshalar týraly qyzyqty maqalalar bar. Al jan-jaqtan kelgen qurmetti qonaqtar úsh kúnge sozylǵan sporttyq, mádenı is-sharalardan shabyt alyp, áserlenip qaıtty.
Ońdasyn ELÝBAI,
Qazaqstannyń qurmetti sport qyzmetkeri
Shyǵys Qazaqstan oblysy,
Zaısan aýdany