О́z áleýetin, ómirlik mańyzdy daǵdylary men kóshbasshylyq qasıetterin damytýǵa, bastamashyl jobalaryn iske asyrýǵa múddeli jastar úshin qurylǵan Zhas project jobasyn iske asyrý qolǵa alyndy. Osyǵan oraı Taldyqorǵandaǵy Jýrnalıster úıinde baspasóz máslıhaty ótti.
Jergilikti BAQ ókilderimen bolǵan kezdesýde alǵashqy bolyp sóz alǵan Aqparat jáne qoǵamdyq damý mınıstrligi Jastar jáne otbasy isteri komıtetiniń basqarma basshysy Almagúl Qutanova atalǵan jobanyń maqsat-mindetin túsindirip ótti.
Al óz kezeginde sóz alǵan Jetisý oblysy ákiminiń orynbasary Rýstam Álı: «Shyny kerek, bul jobany biraz ýaqyt kúttik. Shamamen 2017-2018 jyldary jaqsy nátıje bergen jobaǵa sol kezde 600 mln teńge bólinip, 600 azamat grant utyp alǵan edi. Atalǵan grant ıeleri búginge deıin óz jobalaryn júzege asyrýda», deı kele, aýqymy keńeıgen joba týraly naqtyly málimetterge toqtaldy.
Aqparat jáne qoǵamdyq damý mınıstrligi men Azamattyq bastamalardy qoldaý ortalyǵy birlesip júzege asyrǵan joba jastardyń kásip ashyp, jekeleı, áleýmettik jobalaryn iske asyrýyna múmkindik bermek. 18 ben 28 jas aralyǵyndaǵy azamattar men osal sanattaǵy jastar, jumyssyzdar, az qamtylǵan otbasynan turatyn, jetim jáne múgedek jandar, múgedek balany tárbıelep otyrǵan ata-analar, kópbalaly otbasy, «Altyn alqa» jáne «Kúmis alqa» ıegerlerine atalǵan jobaǵa qatysýǵa mol múmkindik bar.
Kórsetilgen sanatqa jatatyn jandar shilde aıynyń 26-synan tamyzdyń 10-y aralyǵynda Zhas project jobasynyń álemettik jelidegi paraqshasyna ótinim qaldyra alady. Alǵashqy kezeńde ózderiniń jobalaryn usynyp, ótinim qaldyrsa, kelesi kezeńde arnaıy qurylǵan komıssııanyń zerdeleýimen grant ıesi atanýyna bolady. Jıynda bul jaıly «Tamshybulaq» qoǵamdyq birlestiginiń jetekshisi Janat Tólemisova egjeı-tegjeıli baıandady.
Aıta keterligi, Almaty jáne Jetisý, Qaraǵandy, Mańǵystaý men Túrkistan oblystarynda júzege asyrylatyn jobaǵa qatysyp, óz ótinimderin usynǵan jáne nátıjege qol jetkize alǵan jastarǵa 1 mıllıon teńge grant berilmek. Jıyn barysynda osyǵan toqtalǵan qonaqtar kópten beri elge tanys joba týraly tolyqqandy aqparatty paraqshadan onlaın oqı alatynyn da atap ótti.