Qorǵanys mınıstriniń orynbasary Darhan Ahmedıev áskerıler arasyndaǵy sýısıdke tólenbegen nesıeler de sebep bolyp jatqanyn aıtty, dep habarlaıdy Egemen.kz.
«Bizge 18 jastaǵy jigitter boryshyn óteýge keledi. Solardyń ishinde, ókinishke qaraı, moınynda 9 mln teńge turmystyq jáne basqa da nesıesi bar sarbazdar boldy. Bul – bir sebebi. Iаǵnı, budan da bólek áleýmettik problemalar bar. Sonyń bári sýısıdtiń trıggeri bolyp jatyr. Jalpylama aıtý qıyn. Ár jaǵdaıdy jeke alyp qaraý kerek. Ár jaǵdaıda bir ómir qıylyp jatyr. Sondyqtan sebebin jalpylama sıpattap aıtýǵa bolmaıdy», dedi ol Ortalyq kommýnıkasııalar qyzmetinde ótken brıfıngide.
Vıse-mınıstr bıyl tirkelgen qaıǵyly oqıǵalardyń sebebine de toqtaldy.
«Bizde bolǵan 4 qaıǵyly jaǵdaı týraly aıtsaq, ekeýi otbasyndaǵy turmystyq daýdan bolǵan. Qalǵan ekeýi boıynsha tergeý sharalary júrip jatyr. Sondyqtan naqty málimet aıta almaımyn», dedi Darhan Ahmedıev.