Ulttyq statıstıka bıýrosynyń málimeti boıynsha byltyr Qazaqstanǵa kelgen týrıster sany rekordtyq deńgeıge jetken. Iаǵnı pandemııa saltanat qurǵan jyldan keıin elimizge 6,9 mıllıon adam kelgen eken. Sala mamandarynyń aıtýynsha, bul kórsetkish bıyl budan da jaqsara túspek.
Máselen, Mádenıet jáne sport vıse-mınıstri Erjan Erkinbaevtyń málimeti boıynsha týrıstik destınasııalarǵa kelýshiler sany bıyl kúrt artqan. Atap aıtqanda, Shýchınsk-Býrabaı kýrort aımaǵyna kelýshilerdiń sany osy jyldyń 7 aıynda 550 myń adamǵa jetken. Bul kórsetkish byltyrǵy jyldyń alǵashqy jeti aıymen salystyrǵanda 2 esege ósken. Jyl sońyna deıin Býrabaıǵa keletin týrıster sany 1 mıllıonnan asady degen boljam bar.
Sondaı-aq byltyrǵy jyldyń sáıkes kezeńimen salystyrǵanda, «Shymbulaq» taý kýrortyna kelgen týrısterdiń sany eki esege ósken. I jartyjyldyqtyń qorytyndysy boıynsha Almaty taý klasteriniń ulttyq parkterine kelýshiler sany 50%-ǵa artqan. Bıyl ulttyq parkterge 2 mln-ǵa jýyq adam barady dep boljanýda.
«EQonaq statıstıkalyq derekterine sáıkes apta saıyn Qazaqstanǵa keminde 11 myń sheteldik týrıst keledi. Sheteldikterdi ornalastyrý oryndarynda tirkeý boıynsha kóshbasshylar: Almaty, Nur-Sultan qalalary jáne Mańǵystaý oblysy. Bıylǵy naýryzdan bastap ósim 136%-dy qurady», dedi vıse-mınıstr.
Sheteldik kelýshiler sanynyń ósýi halyqaralyq áýe qatynasyn qalpyna keltirýmen, vızasyz rejimdi engizýmen jáne ony yryqtandyrýmen tikeleı baılanysty.
Dúnıejúzilik ekonomıkalyq forýmnyń deregi boıynsha týrızmniń jahandyq reıtınginde Qazaqstan 2021 jyly óz pozısııasyn jaqsartyp, 117 eldiń arasynda 66-orynǵa ıe boldy. Al 2019 jylǵy kórsetkishte Qazaqstan 140 eldiń ishinde 80-orynda turǵan bolatyn.
Sonymen qatar elimiz «Baǵa boıynsha básekege qabilettilik» sanatynda birinshi orynda tursa, «Týrızm maýsymy» boıynsha 26-orynǵa, «Tabıǵı resýrstar» sanatynda – 33-orynǵa, «IýNESKO-nyń Dúnıejúzilik mádenı mura obektileriniń sany» boıynsha 42-orynǵa joǵarylaǵan.